AMOS PROPHETA 9

₁vidi Dominum stantem super altare

et dixit percute cardinem et commoveantur superliminaria

avaritia enim in capite omnium

et novissimum eorum in gladio interficiam non erit fuga eis

fugiet et non salvabitur ex eis qui fugerit

₂si descenderint usque ad infernum inde manus mea educet eos

et si ascenderint usque ad caelum inde detraham eos

₃et si absconditi fuerint in vertice Carmeli

inde scrutans auferam eos

et si celaverint se ab oculis meis in fundo maris

ibi mandabo serpenti et mordebit eos

₄et si abierint in captivitatem coram inimicis suis

ibi mandabo gladio et occidet eos

et ponam oculos meos super eos in malum et non in bonum

₅et Dominus Deus exercituum qui tangit terram et tabescet

et lugebunt omnes habitantes in ea

et ascendet sicut rivus omnis et defluet sicut fluvius Aegypti

₆qui aedificat in caelo ascensionem suam

et fasciculum suum super terram fundavit

qui vocat aquas maris et effundit eas super faciem terrae

Dominus nomen eius

₇numquid non ut filii Aethiopum vos estis mihi filii Israhel ait Dominus

numquid non Israhel ascendere feci de terra Aegypti

et Palestinos de Cappadocia et Syros de Cyrene

₈ecce oculi Domini Dei super regnum peccans

et conteram illud a facie terrae

verumtamen conterens non conteram domum Iacob dicit Dominus

₉ecce enim ego mandabo

et concutiam in omnibus gentibus domum Israhel

sicut concutitur in cribro

et non cadet lapillus super terram

₁₀in gladio morientur omnes peccatores populi mei

qui dicunt non adpropinquabit et non veniet super nos malum

₁₁in die illo suscitabo tabernaculum David quod cecidit

et reaedificabo aperturas murorum eius

et ea quae corruerant instaurabo

et reaedificabo eum sicut diebus antiquis

₁₂ut possideant reliquias Idumeae et omnes nationes

eo quod invocatum sit nomen meum super eos

dicit Dominus faciens haec

₁₃ecce dies veniunt dicit Dominus

et conprehendet arator messorem

et calcator uvae mittentem semen

et stillabunt montes dulcedinem et omnes colles culti erunt

₁₄et convertam captivitatem populi mei Israhel

et aedificabunt civitates desertas et habitabunt

et plantabunt vineas et bibent vinum earum

et facient hortos et comedent fructus eorum

₁₅et plantabo eos super humum suam

et non evellam eos ultra de terra sua quam dedi eis

dicit Dominus Deus tuus