IONA PROPHETA 1

₁Et factum est verbum Domini ad Ionam filium Amathi dicens

₂surge vade in Nineven civitatem grandem

et praedica in ea

quia ascendit malitia eius coram me

₃et surrexit Iona ut fugeret in Tharsis a facie Domini

et descendit Ioppen

et invenit navem euntem in Tharsis

et dedit naulum eius et descendit in eam

ut iret cum eis in Tharsis a facie Domini

₄Dominus autem misit ventum magnum in mari

et facta est tempestas magna in mari

et navis periclitabatur conteri

₅et timuerunt nautae

et clamaverunt viri ad deum suum

et miserunt vasa quae erant in navi in mare

ut adleviaretur ab eis

et Iona descendit ad interiora navis

et dormiebat sopore gravi

₆et accessit ad eum gubernator et dixit ei

quid tu sopore deprimeris

surge invoca Deum tuum

si forte recogitet Deus de nobis et non pereamus

₇et dixit vir ad collegam suum venite et mittamus sortes

et sciamus quare hoc malum sit nobis

et miserunt sortes et cecidit sors super Ionam

₈et dixerunt ad eum

indica nobis cuius causa malum istud sit nobis

quod est opus tuum quae terra tua

et quo vel ex quo populo es tu

₉et dixit ad eos Hebraeus ego sum

et Dominum Deum caeli ego timeo qui fecit mare et aridam

₁₀et timuerunt viri timore magno

et dixerunt ad eum quid hoc fecisti

cognoverunt enim viri quod a facie Domini fugeret

quia indicaverat eis

₁₁et dixerunt ad eum quid faciemus tibi et cessabit mare a nobis

quia mare ibat et intumescebat

₁₂et dixit ad eos

tollite me et mittite in mare et cessabit mare a vobis

scio enim ego

quoniam propter me tempestas grandis haec

super vos

₁₃et remigabant viri ut reverterentur ad aridam et non valebant

quia mare ibat et intumescebat super eos

₁₄et clamaverunt ad Dominum et dixerunt

quaesumus Domine ne pereamus in anima viri istius

et ne des super nos sanguinem innocentem

quia tu Domine sicut voluisti fecisti

₁₅et tulerunt Ionam et miserunt in mare

et stetit mare a fervore suo

₁₆et timuerunt viri timore magno Dominum

et immolaverunt hostias Domino et voverunt vota