LIBER NUMERORUM 32

₁filii autem Ruben et Gad habebant pecora multa

et erat illis in iumentis infinita substantia

cumque vidissent Iazer et Galaad aptas alendis animalibus

₂venerunt ad Mosen et ad Eleazarum sacerdotem et principes

multitudinis atque dixerunt

₃Atharoth et Dibon et Iazer et Nemra

Esbon et Eleale et Sabam et Nebo et Beon

₄terram quam percussit Dominus in conspectu filiorum Israhel

regionis uberrimae est ad

pastum animalium

et nos servi tui habemus iumenta plurima

₅precamurque si invenimus gratiam coram te

ut des nobis famulis tuis eam in possessionem

ne facias nos transire Iordanem

₆quibus respondit Moses

numquid fratres vestri ibunt ad pugnam et vos hic sedebitis

₇cur subvertitis mentes filiorum Israhel

ne transire audeant in locum quem eis daturus est Dominus

₈nonne ita egerunt patres vestri

quando misi de Cadesbarne ad explorandam terram

₉cumque venissent usque ad Vallem Botri

lustrata omni regione subverterunt cor filiorum Israhel

ut non intrarent fines quos eis Dominus dedit

₁₀qui iratus iuravit dicens

₁₁si videbunt homines isti qui ascenderunt ex Aegypto

a viginti annis et supra

terram quam sub iuramento pollicitus sum Abraham Isaac et

Iacob

et noluerunt sequi me

₁₂praeter Chaleb filium Iepphonne Cenezeum et Iosue filium Nun

isti impleverunt voluntatem meam

₁₃iratusque Dominus adversum Israhel

circumduxit eum per desertum quadraginta annis

donec consumeretur universa generatio

quae fecerat malum in conspectu eius

₁₄et ecce inquit vos surrexistis pro patribus vestris

incrementa et alumni hominum peccatorum

ut augeretis furorem Domini contra Israhel

₁₅qui si nolueritis sequi eum

in solitudine populum derelinquet

et vos causa eritis necis omnium

₁₆at illi prope accedentes dixerunt

caulas ovium fabricabimus et stabula iumentorum

parvulis quoque nostris urbes munitas

₁₇nos autem ipsi armati et accincti

pergemus ad proelium ante filios Israhel

donec introducamus eos ad loca sua

parvuli nostri et quicquid habere possumus

erunt in urbibus muratis propter habitatorum insidias

₁₈non revertemur in domos nostras

usquequo possideant filii

Israhel hereditatem suam

₁₉nec quicquam quaeremus trans Iordanem

quia iam habemus possessionem nostram in orientali eius

plaga

₂₀quibus Moses ait

si facitis quod promittitis expediti pergite coram Domino ad pugnam

₂₁et omnis vir bellator armatus Iordanem transeat

donec subvertat Dominus inimicos suos

₂₂et subiciatur ei omnis terra

tunc eritis inculpabiles et apud Dominum et apud Israhel

et obtinebitis regiones quas vultis coram Domino

₂₃sin autem quod dicitis non feceritis

nulli dubium quin peccetis in Dominum

et scitote quoniam peccatum vestrum adprehendet vos

₂₄aedificate ergo urbes parvulis vestris

et caulas ac stabula ovibus ac iumentis

et quod polliciti estis implete

₂₅dixeruntque filii Gad et Ruben ad Mosen

servi tui sumus faciemus quod iubet dominus noster

₂₆parvulos nostros et mulieres et pecora ac iumenta relinquemus

in urbibus Galaad

₂₇nos autem famuli tui omnes expediti pergemus ad bellum

sicut tu domine loqueris

₂₈praecepit ergo Moses Eleazaro sacerdoti et Iosue filio Nun

et principibus familiarum per tribus Israhel

et dixit ad eos

₂₉si transierint filii Gad et filii Ruben vobiscum Iordanem

omnes armati ad bellum coram Domino

et vobis fuerit terra subiecta

date eis Galaad in possessionem

₃₀sin autem noluerint transire vobiscum in terram

Chanaan

inter vos habitandi accipiant loca

₃₁responderuntque filii Gad et filii Ruben

sicut locutus est Dominus servis suis ita faciemus

₃₂ipsi armati pergemus coram Domino in terram Chanaan

et possessionem iam suscepisse nos confitemur trans

Iordanem

₃₃dedit itaque Moses filiis Gad et Ruben

et dimidiae tribui Manasse filii Ioseph

regnum Seon regis Amorrei et regnum Og regis Basan

et terram eorum cum urbibus suis per circuitum

₃₄igitur extruxerunt filii Gad Dibon et Atharoth et Aroer

₃₅Etrothsophan et Iazer

Iecbaa

₃₆et Bethnemra et Betharan urbes

munitas

et caulas pecoribus suis

₃₇filii vero Ruben aedificaverunt

Esbon et Eleale et Cariathaim

₃₈et Nabo et Baalmeon versis nominibus

Sabama quoque inponentes vocabula urbibus quas extruxerant

₃₉porro filii Machir filii Manasse

perrexerunt in Galaad et vastaverunt eam

interfecto Amorreo habitatore eius

₄₀dedit ergo Moses terram Galaad

Machir filio Manasse qui habitavit in ea

₄₁Iair autem filius Manasse abiit et occupavit vicos eius

quos appellavit Avothiair id est villas Iair

₄₂Nobe quoque perrexit et adprehendit Canath cum viculis suis

vocavitque eam ex nomine suo Nobe