LIBER NUMERORUM 33

₁hae sunt mansiones filiorum Israhel

qui egressi sunt de Aegypto per turmas suas in manu Mosi et Aaron

₂quas descripsit Moses iuxta castrorum loca

quae Domini iussione mutabant

₃profecti igitur de Ramesse

mense primo quintadecima die mensis primi altera die phase

filii Israhel in manu excelsa

videntibus cunctis Aegyptiis

₄et sepelientibus primogenitos quos percusserat Dominus

nam et in diis eorum exercuerat ultionem

₅castrametati sunt in Soccoth

₆et de Soccoth venerunt in Aetham

quae est in extremis finibus solitudinis

₇inde egressi venerunt contra Phiahiroth quae respicit Beelsephon

et castrametati sunt ante Magdolum

₈profectique de Phiahiroth transierunt per medium mare in solitudinem

et ambulantes tribus diebus per desertum Aetham

castrametati sunt in Mara

₉profectique de Mara venerunt in Helim

ubi erant duodecim fontes aquarum et palmae septuaginta

ibique castrametati sunt

₁₀sed et inde egressi fixere tentoria super mare Rubrum

profectique de mari Rubro

₁₁castrametati sunt in deserto Sin

₁₂unde egressi venerunt in Dephca

₁₃profectique de Dephca castrametati sunt in Alus

₁₄egressi de Alus Raphidim fixere

tentoria

ubi aqua populo defuit ad bibendum

₁₅profectique de Raphidim castrametati sunt in deserto Sinai

₁₆sed et de solitudine Sinai egressi

venerunt ad sepulchra Concupiscentiae

₁₇profectique de sepulchris Concupiscentiae

castrametati sunt in Aseroth

₁₈et de Aseroth venerunt in Rethma

₁₉profectique de Rethma castrametati sunt in Remmonphares

₂₀unde egressi venerunt in Lebna

₂₁et de Lebna castrametati sunt in Ressa

₂₂egressi de Ressa venerunt in Ceelatha

₂₃unde profecti castrametati sunt in monte Sepher

₂₄egressi de monte Sepher venerunt in Arada

₂₅inde proficiscentes castrametati sunt in Maceloth

₂₆profectique de Maceloth venerunt in Thaath

₂₇de Thaath castrametati sunt in Thare

₂₈unde egressi fixerunt tentoria in Methca

₂₉et de Methca castrametati sunt in Esmona

₃₀profectique de Esmona venerunt in Moseroth

₃₁et de Moseroth castrametati sunt in Baneiacan

₃₂egressique de Baneiacan venerunt in montem

Gadgad

₃₃unde profecti castrametati sunt in Hietebatha

₃₄et de Hietebatha venerunt in Ebrona

₃₅egressique de Ebrona castrametati sunt in Asiongaber

₃₆inde profecti venerunt in desertum Sin haec est Cades

₃₇egressique de Cades castrametati sunt in monte Hor

in extremis finibus terrae Edom

₃₈ascenditque Aaron sacerdos montem Hor iubente

Domino

et ibi mortuus est

anno quadragesimo egressionis filiorum Israhel ex Aegypto

mense quinto prima die mensis

₃₉cum esset annorum centum viginti trium

₄₀audivitque Chananeus rex Arad

qui habitabat ad meridiem in terra Chanaan

venisse filios Israhel

₄₁et profecti de monte Hor castrametati sunt in Salmona

₄₂unde egressi venerunt in Phinon

₄₃profectique de Phinon castrametati sunt in Oboth

₄₄et de Oboth venerunt in Ieabarim quae est in finibus Moabitarum

₄₅profectique de Ieabarim fixere tentoria in Dibongad

₄₆unde egressi castrametati sunt in Elmondeblathaim

₄₇egressi de Elmondeblathaim

venerunt ad montes Abarim contra Nabo

₄₈profectique de montibus Abarim

transierunt ad campestria Moab super

Iordanem contra Hiericho

₄₉ibique castrametati sunt

de Bethsimon usque ad Belsattim in

planioribus locis Moabitarum

₅₀ubi locutus est Dominus ad Mosen

₅₁praecipe filiis Israhel et dic ad eos

quando transieritis Iordanem intrantes terram Chanaan

₅₂disperdite cunctos habitatores regionis illius

confringite titulos et statuas comminuite

atque omnia excelsa vastate

₅₃mundantes terram et habitantes in ea

ego enim dedi vobis illam in possessionem

₅₄quam dividetis vobis sorte

pluribus dabitis latiorem et paucis angustiorem

singulis ut sors ceciderit ita tribuetur hereditas

per tribus et familias possessio dividetur

₅₅sin autem nolueritis interficere habitatores

terrae

qui remanserint erunt vobis quasi clavi in oculis

et lanceae in lateribus

et adversabuntur vobis in terra habitationis vestrae

₅₆et quicquid illis facere cogitaram vobis faciam