LIBER NUMERORUM 31

₁locutusque est Dominus ad Mosen dicens

₂ulciscere prius filios Israhel de Madianitis

et sic colligeris ad populum tuum

₃statimque Moses armate inquit ex vobis viros ad pugnam

qui possint ultionem Domini expetere de Madianitis

₄mille viri de singulis tribubus eligantur Israhel

qui mittantur ad bellum

₅dederuntque millenos de cunctis tribubus

id est duodecim milia expeditorum ad pugnam

₆quos misit Moses cum Finees filio Eleazari sacerdotis

vasa quoque sancta et tubas ad clangendum tradidit ei

₇cumque pugnassent contra Madianitas atque vicissent

omnes mares occiderunt

₈et reges eorum Evi et Recem et Sur et Ur et Rebe

quinque principes gentis

Balaam quoque filium Beor interfecerunt gladio

₉ceperuntque mulieres eorum et parvulos

omniaque pecora et cunctam supellectilem

quicquid habere potuerant depopulati sunt

₁₀tam urbes quam viculos et castella flamma consumpsit

₁₁et tulerunt praedam et universa quae ceperant

tam ex hominibus quam ex iumentis

₁₂et adduxerunt ad Mosen et Eleazarum sacerdotem

et ad omnem multitudinem filiorum Israhel

reliqua etiam utensilia portaverunt ad castra

in campestribus Moab iuxta Iordanem contra Hiericho

₁₃egressi sunt autem Moses et Eleazar sacerdos et omnes principes

synagogae

in occursum eorum extra castra

₁₄iratusque Moses principibus exercitus

tribunis et centurionibus qui venerant de bello

₁₅ait

cur feminas reservastis

₁₆nonne istae sunt

quae deceperunt filios Israhel ad suggestionem Balaam

et praevaricari vos fecerunt in Domino super peccato

Phogor

unde et percussus est populus

₁₇ergo cunctos interficite

quicquid est generis masculini etiam in parvulis

et mulieres quae noverunt viros in coitu iugulate

₁₈puellas autem et omnes feminas virgines reservate vobis

₁₉et manete extra castra septem diebus

qui occiderit hominem vel occisum tetigerit

lustrabitur die tertio et septimo

₂₀et de omni praeda sive vestimentum fuerit sive vas

et aliquid in utensilia praeparatum

de caprarum pellibus et pilis et ligno expiabitur

₂₁Eleazar quoque sacerdos ad viros exercitus qui pugnaverant sic locutus

est

hoc est praeceptum legis quod mandavit Dominus Mosi

₂₂aurum et argentum et aes et ferrum et stagnum et plumbum

₂₃et omne quod potest transire per flammas igne purgabitur

quicquid autem ignem non potest sustinere

aqua expiationis sanctificabitur

₂₄et lavabitis vestimenta vestra die septimo

et purificati postea castra intrabitis

₂₅dixitque Dominus ad Mosen

₂₆tollite summam eorum quae capta sunt

ab homine usque ad pecus

tu et Eleazar sacerdos et principes vulgi

₂₇dividesque ex aequo praedam

inter eos qui pugnaverunt et egressi sunt ad bellum

et inter omnem reliquam multitudinem

₂₈et separabis partem Domino

ab his qui pugnaverunt et fuerunt in bello

unam animam de quingentis

tam ex hominibus quam ex bubus et asinis et ovibus

₂₉et dabis eam Eleazaro sacerdoti quia primitiae Domini sunt

₃₀ex media quoque parte filiorum Israhel

accipies quinquagesimum caput

hominum et boum et asinorum et ovium cunctarumque animantium

et dabis ea Levitis qui excubant in custodiis tabernaculi Domini

₃₁feceruntque Moses et Eleazar sicut praeceperat Dominus

₃₂fuit autem praeda quam exercitus ceperat

ovium sescenta septuaginta quinque milia

₃₃boum septuaginta duo milia

₃₄asinorum sexaginta milia et mille

₃₅animae hominum sexus feminei quae non cognoverant viros triginta duo

milia

₃₆dataque est media pars his qui in proelio fuerant

ovium trecenta triginta septem milia quingenta

₃₇e quibus in partem Domini supputatae sunt

oves sescentae septuaginta quinque

₃₈et de bubus triginta sex milibus boves septuaginta duo

₃₉de asinis triginta milibus quingentis

asini sexaginta unus

₄₀de animabus hominum sedecim milibus

cesserunt in partem Domini triginta duae animae

₄₁tradiditque Moses numerum primitiarum Domini Eleazaro sacerdoti

sicut ei fuerat imperatum

₄₂ex media parte filiorum Israhel

quam separaverat his qui in proelio fuerant

₄₃de media vero parte quae contigerat reliquae multitudini

id est de ovium trecentis triginta septem milibus

quingentis

₄₄et de bubus triginta sex milibus

₄₅et de asinis triginta milibus quingentis

₄₆et de hominibus sedecim milibus

₄₇tulit Moses quinquagesimum caput

et dedit Levitis qui excubant in tabernaculo Domini

sicut praeceperat Dominus

₄₈cumque accessissent principes exercitus ad Mosen

et tribuni centurionesque dixerunt

₄₉nos servi tui recensuimus numerum pugnatorum

quos habuimus sub manu nostra

et ne unus quidem defuit

₅₀ob hanc causam offerimus in donariis Domini

singuli quod in praeda auri potuimus invenire

periscelides et armillas anulos et dextralia ac murenulas

ut depreceris pro nobis Dominum

₅₁susceperuntque Moses et Eleazar sacerdos

omne aurum in diversis speciebus

₅₂pondo sedecim milia septingentos quinquaginta siclos

a tribunis et centurionibus

₅₃unusquisque enim quod in praeda rapuerat suum erat

₅₄et susceptum intulerunt in tabernaculum testimonii

in monumentum filiorum Israhel coram Domino