LIBER NUMERORUM 27

₁accesserunt autem filiae Salphaad filii Epher filii Galaad filii Machir

filii Manasse

qui fuit filius Ioseph

quarum sunt nomina Maala et Noa et Egla et Melcha et Thersa

₂steteruntque coram Mosen et Eleazaro sacerdote

et cunctis principibus populi

ad ostium tabernaculi foederis atque dixerunt

₃pater noster mortuus est in deserto

nec fuit in seditione quae concitata est contra Dominum sub Core

sed in peccato suo mortuus est

hic non habuit mares filios

cur tollitur nomen illius de familia sua

quia non habet filium

date nobis possessionem inter cognatos patris nostri

₄rettulitque Moses causam earum ad iudicium Domini

₅qui dixit ad eum

₆iustam rem postulant filiae Salphaad

da eis possessionem inter cognatos patris sui

et ei in hereditate succedant

₇ad filios autem Israhel loqueris haec

₈homo cum mortuus fuerit absque filio

ad filiam eius transibit hereditas

₉si filiam non habuerit habebit successores fratres suos

₁₀quod si et fratres non fuerint

dabitis hereditatem fratribus patris eius

₁₁sin autem nec patruos habuerit

dabitur hereditas his qui ei proximi sunt

eritque hoc filiis Israhel sanctum lege perpetua

sicut praecepit Dominus Mosi

₁₂dixit quoque Dominus ad Mosen

ascende in montem istum Abarim

et contemplare inde terram quam daturus sum filiis Israhel

₁₃cumque videris eam ibis et tu ad populum tuum

sicut ivit frater tuus Aaron

₁₄quia offendistis me in deserto Sin in contradictione

multitudinis

nec sanctificare me voluistis coram ea super

aquas

hae sunt aquae Contradictionis in Cades deserti Sin

₁₅cui respondit Moses

₁₆provideat Dominus Deus spirituum omnis carnis

hominem qui sit super multitudinem hanc

₁₇et possit exire et intrare ante eos et educere illos vel

introducere

ne sit populus Domini sicut oves absque pastore

₁₈dixitque Dominus ad eum

tolle Iosue filium Nun virum in quo est spiritus

et pone manum tuam super eum

₁₉qui stabit coram Eleazaro sacerdote et omni multitudine

₂₀et dabis ei praecepta cunctis videntibus et partem gloriae tuae

ut audiat eum omnis synagoga filiorum Israhel

₂₁pro hoc si quid agendum erit Eleazar sacerdos consulet Dominum

ad verbum eius egredietur et ingredietur

ipse et omnes filii Israhel cum eo et cetera multitudo

₂₂fecit Moses ut praeceperat Dominus

cumque tulisset Iosue

statuit eum coram Eleazaro sacerdote et omni frequentia populi

₂₃et inpositis capiti eius manibus

cuncta replicavit quae mandaverat Dominus