LIBER NUMERORUM 28

₁dixit quoque Dominus ad Mosen

₂praecipe filiis Israhel et dices ad eos

oblationem meam et panes et incensum odoris suavissimi

offerte per tempora sua

₃haec sunt sacrificia quae offerre debetis

agnos anniculos inmaculatos duos cotidie in holocaustum sempiternum

₄unum offeretis mane et alterum ad vesperam

₅decimam partem oephi similae quae conspersa sit oleo purissimo

et habeat quartam partem hin

₆holocaustum iuge est quod obtulistis in monte Sinai

in odorem suavissimum incensi Domini

₇et libabitis vini quartam partem hin

per agnos singulos in sanctuario Domini

₈alterumque agnum similiter offeretis ad vesperam

iuxta omnem ritum sacrificii matutini et libamentorum eius

oblationem suavissimi odoris Domino

₉die autem sabbati offeretis duos agnos anniculos inmaculatos

et duas decimas similae oleo conspersae in sacrificio

et liba

₁₀quae rite funduntur

per singula sabbata in holocausto sempiterno

₁₁in kalendis autem id est in mensuum exordiis

offeretis holocaustum Domino

vitulos de armento duos arietem unum

agnos anniculos septem inmaculatos

₁₂et tres decimas similae oleo conspersae

in sacrificio per singulos vitulos

et duas decimas similae oleo conspersae per singulos arietes

₁₃et decimam decimae similae ex oleo

in sacrificio per agnos singulos

holocaustum suavissimi odoris atque incensi est Domino

₁₄libamenta autem vini quae per singulas fundenda sunt victimas ista erunt

media pars hin per vitulos singulos

tertia per arietem quarta per agnum

hoc erit holocaustum

per omnes menses qui sibi anno vertente succedunt

₁₅hircus quoque offeretur Domino pro peccatis

in holocaustum sempiternum cum libamentis suis

₁₆mense autem primo quartadecima die mensis phase Domini erit

₁₇et quintadecima die sollemnitas

septem diebus vescentur azymis

₁₈quarum dies prima venerabilis et sancta erit

omne opus servile non facietis in ea

₁₉offeretisque incensum holocaustum

Domino

vitulos de armento duos arietem unum

agnos anniculos inmaculatos septem

₂₀et sacrificia singulorum ex simila quae conspersa sit oleo

tres decimas per singulos vitulos et duas decimas per arietem

₂₁et decimam decimae per agnos singulos id est per septem agnos

₂₂et hircum pro peccato unum ut expietur pro vobis

₂₃praeter holocaustum matutinum quod semper offertis

₂₄ita facietis per singulos dies septem dierum

in fomitem ignis et in odorem suavissimum Domino

qui surget de holocausto et de libationibus singulorum

₂₅dies quoque septimus celeberrimus et sanctus erit vobis

omne opus servile non facietis in eo

₂₆dies etiam primitivorum

quando offertis novas fruges Domino

expletis ebdomadibus

venerabilis et sancta erit omne opus servile non facietis in ea

₂₇offeretisque holocaustum in odorem suavissimum Domino

vitulos de armento duos arietem unum

et agnos anniculos inmaculatos septem

₂₈atque in sacrificiis eorum

similae oleo conspersae tres decimas per singulos vitulos

per arietes duas

₂₉per agnos decimam decimae qui simul sunt agni septem

hircum quoque ₃₀qui mactatur pro expiatione

praeter holocaustum sempiternum et liba eius

₃₁inmaculata offeretis omnia cum libationibus suis