LIBER NUMERORUM 26

₁postquam noxiorum sanguis effusus est

dixit Dominus ad Mosen et Eleazarum filium Aaron sacerdotem

₂numerate omnem summam filiorum Israhel a viginti annis et supra

per domos et cognationes suas

cunctos qui possunt ad bella procedere

₃locuti sunt itaque Moses et Eleazar sacerdos

in campestribus Moab super Iordanem contra Hierichum

ad eos qui erant

₄a viginti annis et supra

sicut Dominus imperarat

quorum iste est numerus

₅Ruben primogenitus Israhel

huius filius Enoch a quo familia Enochitarum

et Phallu a quo familia Phalluitarum

₆et Esrom a quo familia Esromitarum

et Charmi a quo familia Charmitarum

₇hae sunt familiae de stirpe Ruben

quarum numerus inventus est quadraginta tria milia et

septingenti triginta

₈filius Phallu Heliab

₉huius filii Namuhel et Dathan et Abiram

isti sunt Dathan et Abiram principes populi

qui surrexerunt contra Mosen et Aaron in seditione Core

quando adversum Dominum rebellaverunt

₁₀et aperiens terra os suum devoravit Core

morientibus plurimis

quando conbusit ignis ducentos quinquaginta viros

et factum est grande miraculum

₁₁ut Core pereunte filii illius non perirent

₁₂filii Symeon per cognationes suas

Namuhel ab hoc familia Namuhelitarum

Iamin ab hoc familia Iaminitarum

Iachin ab hoc familia Iachinitarum

₁₃Zare ab hoc familia Zareitarum

Saul ab hoc familia Saulitarum

₁₄hae sunt familiae de stirpe Symeon

quarum omnis numerus fuit viginti duo milia ducentorum

₁₅filii Gad per cognationes suas

Sephon ab hoc familia Sephonitarum

Aggi ab hoc familia Aggitarum

Suni ab hoc familia Sunitarum

₁₆Ozni ab hoc familia Oznitarum

Heri ab hoc familia Heritarum

₁₇Arod ab hoc familia Aroditarum

Arihel ab hoc familia Arihelitarum

₁₈istae sunt familiae Gad

quarum omnis numerus fuit quadraginta milia quingentorum

₁₉filii Iuda Her et Onan qui ambo mortui sunt in terra Chanaan

₂₀fueruntque filii Iuda per cognationes suas

Sela a quo familia Selanitarum

Phares a quo familia Pharesitarum

Zare a quo familia Zareitarum

₂₁porro filii Phares

Esrom a quo familia Esromitarum

et Amul a quo familia Amulitarum

₂₂istae sunt familiae Iuda

quarum omnis numerus fuit septuaginta milia quingentorum

₂₃filii Isachar per cognationes suas

Thola a quo familia Tholaitarum

Phua a quo familia Phuaitarum

₂₄Iasub a quo familia Iasubitarum

Semran a quo familia Semranitarum

₂₅hae sunt cognationes Isachar

quarum numerus fuit sexaginta quattuor milia trecentorum

₂₆filii Zabulon per cognationes suas

Sared a quo familia Sareditarum

Helon a quo familia Helonitarum

Ialel a quo familia Ialelitarum

₂₇hae sunt cognationes Zabulon

quarum numerus fuit sexaginta milia quingentorum

₂₈filii Ioseph per cognationes suas Manasse et Ephraim

₂₉de Manasse ortus est Machir a quo familia Machiritarum

Machir genuit Galaad a quo familia Galaaditarum

₃₀Galaad habuit filios Hiezer a quo familia Hiezeritarum

et Elec a quo familia Elecarum

₃₁et Asrihel a quo familia Asrihelitarum

et Sechem a quo familia Sechemitarum

₃₂et Semida a quo familia Semidatarum

et Epher a quo familia Epheritarum

₃₃fuit autem Epher pater Salphaad

qui filios non habebat sed tantum filias

quarum ista sunt nomina Maala et Noa et Egla et Melcha et Thersa

₃₄hae sunt familiae Manasse

et numerus earum quinquaginta duo milia septingentorum

₃₅filii autem Ephraim per cognationes suas fuerunt hii

Suthala a quo familia Suthalitarum

Becher a quo familia Becheritarum

Tehen a quo familia Tehenitarum

₃₆porro filius Suthala fuit Heran a quo familia Heranitarum

₃₇hae sunt cognationes filiorum Ephraim

quarum numerus triginta duo milia quingentorum

₃₈isti sunt filii Ioseph per familias suas

filii Beniamin in cognationibus suis

Bale a quo familia Baleitarum

Azbel a quo familia Azbelitarum

Ahiram a quo familia Ahiramitarum

₃₉Supham a quo familia Suphamitarum

Hupham a quo familia Huphamitarum

₄₀filii Bale Hered et Noeman

de Hered familia Hereditarum

de Noeman familia Noemitarum

₄₁hii sunt filii Beniamin per cognationes suas

quorum numerus quadraginta quinque milia sescentorum

₄₂filii Dan per cognationes suas

Suham a quo familia Suhamitarum

hae cognationes Dan per familias suas

₄₃omnes fuere Suhamitae

quorum numerus erat sexaginta quattuor milia quadringentorum

₄₄filii Aser per cognationes suas

Iemna a quo familia Iemnaitarum

Iessui a quo familia Iessuitarum

Brie a quo familia Brieitarum

₄₅filii Brie Haber a quo familia Haberitarum

et Melchihel a quo familia Melchihelitarum

₄₆nomen autem filiae Aser fuit Sara

₄₇hae cognationes filiorum Aser

et numerus eorum quinquaginta tria milia quadringentorum

₄₈filii Nepthalim per cognationes suas

Iessihel a quo familia Iessihelitarum

Guni a quo familia Gunitarum

₄₉Iesser a quo familia Iesseritarum

Sellem a quo familia Sellemitarum

₅₀hae sunt cognationes filiorum Nepthalim per familias suas

quorum numerus quadraginta quinque milia quadringentorum

₅₁ista est summa filiorum Israhel qui recensiti sunt

sescenta milia et mille septingenti triginta

₅₂locutusque est Dominus ad Mosen dicens

₅₃istis dividetur terra iuxta numerum vocabulorum in possessiones suas

₅₄pluribus maiorem partem dabis et paucioribus minorem

singulis sicut nunc recensiti sunt tradetur possessio

₅₅ita dumtaxat ut sors terram tribubus dividat et familiis

₅₆quicquid sorte contigerit

hoc vel plures accipient vel pauciores

₅₇hic quoque est numerus filiorum Levi per familias suas

Gerson a quo familia Gersonitarum

Caath a quo familia Caathitarum

Merari a quo familia Meraritarum

₅₈hae sunt familiae Levi

familia Lobni familia Hebroni

familia Mooli familia Musi familia Cori

at vero Caath genuit Amram

₅₉qui habuit uxorem Iochabed filiam Levi

quae nata est ei in Aegypto

haec genuit viro suo Amram filios

Aaron et Mosen et Mariam sororem eorum

₆₀de Aaron orti sunt Nadab et Abiu et Eleazar et Ithamar

₆₁quorum Nadab et Abiu mortui sunt

cum obtulissent ignem alienum coram Domino

₆₂fueruntque omnes qui numerati sunt viginti tria milia generis masculini

ab uno mense et supra

quia non sunt recensiti inter filios Israhel

nec eis cum ceteris data possessio

₆₃hic est numerus filiorum Israhel

qui descripti sunt a Mosen et Eleazaro sacerdote

in campestribus Moab supra Iordanem contra Hiericho

₆₄inter quos nullus fuit eorum

qui ante numerati sunt a Mose et Aaron in deserto Sinai

₆₅praedixerat enim Dominus quod omnes morerentur in solitudine

nullusque remansit ex eis nisi Chaleb filius Iepphonne et Iosue filius

Nun