LIBER NUMERORUM 14

₁igitur vociferans omnis turba flevit nocte illa

₂et murmurati sunt contra Mosen et Aaron cuncti filii

Israhel dicentes

₃utinam mortui essemus in Aegypto et non in hac vasta

solitudine

utinam pereamus et non inducat nos Dominus in terram istam

ne cadamus gladio et uxores ac liberi nostri ducantur captivi

nonne melius est reverti in Aegyptum

₄dixeruntque alter ad alterum

constituamus nobis ducem et revertamur in Aegyptum

₅quo audito Moses et Aaron ceciderunt proni in terram

coram omni multitudine filiorum Israhel

₆at vero Iosue filius Nun et Chaleb filius Iepphonne

qui et ipsi lustraverant terram

sciderunt vestimenta sua

₇et ad omnem multitudinem filiorum Israhel locuti sunt

terram quam circuivimus valde bona est

₈si propitius fuerit Dominus inducet nos in eam

et tradet humum lacte et melle manantem

₉nolite rebelles esse contra Dominum

neque timeatis populum terrae huius

quia sicut panem ita eos possumus devorare

recessit ab illis omne praesidium

Dominus nobiscum est nolite metuere

₁₀cumque clamaret omnis multitudo

et lapidibus eos vellet opprimere

apparuit gloria Domini super tectum foederis cunctis filiis Israhel

₁₁et dixit Dominus ad Mosen usquequo detrahet mihi populus iste

quousque non credent mihi in omnibus signis quae feci coram eis

₁₂feriam igitur eos pestilentia atque consumam

te autem faciam principem super gentem magnam et fortiorem quam haec est

₁₃et ait Moses ad Dominum

ut audiant Aegyptii de quorum medio eduxisti populum istum

₁₄et habitatores terrae huius

qui audierunt quod tu Domine in populo isto sis

et facie videaris ad faciem et nubes tua protegat illos

et in columna nubis praecedas eos per diem

et in columna ignis per noctem

₁₅quod occideris tantam multitudinem quasi unum hominem

et dicant

₁₆non poterat introducere populum in terram pro qua

iuraverat

idcirco occidit eos in solitudine

₁₇magnificetur ergo fortitudo Domini sicut iurasti dicens

₁₈Dominus patiens et multae misericordiae

auferens iniquitatem et scelera nullumque innoxium derelinquens

qui visitas peccata patrum in filios

in tertiam et quartam generationem

₁₉dimitte obsecro peccatum populi tui huius

secundum magnitudinem misericordiae tuae

sicut propitius fuisti egredientibus de Aegypto usque ad locum istum

₂₀dixitque Dominus dimisi iuxta verbum tuum

₂₁vivo ego et implebitur gloria Domini universa terra

₂₂attamen omnes homines qui viderunt maiestatem meam

et signa quae feci in Aegypto et in solitudine

et temptaverunt me iam per decem vices nec oboedierunt voci meae

₂₃non videbunt terram pro qua iuravi patribus eorum

nec quisquam ex illis qui detraxit mihi intuebitur eam

₂₄servum meum Chaleb qui plenus alio spiritu secutus est me

inducam in terram hanc quam circuivit

et semen eius possidebit eam

₂₅quoniam Amalechites et Chananeus habitant in vallibus

cras movete castra

et revertimini in solitudinem per viam maris Rubri

₂₆locutusque est Dominus ad Mosen et Aaron dicens

₂₇usquequo multitudo haec pessima murmurat contra me

querellas filiorum Israhel audivi

₂₈dic ergo eis vivo ego ait Dominus

sicut locuti estis audiente me sic faciam vobis

₂₉in solitudine hac iacebunt cadavera vestra

omnes qui numerati estis a viginti annis et supra

et murmurastis contra me

₃₀non intrabitis terram super quam levavi manum meam

ut habitare vos facerem

praeter Chaleb filium Iepphonne et Iosue filium Nun

₃₁parvulos autem vestros

de quibus dixistis quod praedae hostibus forent

introducam ut videant terram quae vobis displicuit

₃₂vestra cadavera iacebunt in solitudine

₃₃filii vestri erunt vagi in deserto annis quadraginta

et portabunt fornicationem vestram

donec consumantur cadavera patrum in deserto

₃₄iuxta numerum quadraginta dierum quibus considerastis terram

annus pro die inputabitur

et quadraginta annis recipietis iniquitates vestras

et scietis ultionem meam

₃₅quoniam sicut locutus sum

ita faciam omni multitudini huic pessimae

quae consurrexit adversum me

in solitudine hac deficiet et morietur

₃₆igitur omnes viri quos miserat Moses ad contemplandam terram

et qui reversi murmurare fecerant contra eum omnem multitudinem

detrahentes terrae quod esset mala

₃₇mortui sunt atque percussi in conspectu Domini

₃₈Iosue autem filius Nun et Chaleb filius Iepphonne

vixerunt ex omnibus qui perrexerant ad considerandam terram

₃₉locutusque est Moses universa verba haec ad omnes filios Israhel

et luxit populus nimis

₄₀et ecce mane primo surgentes

ascenderunt verticem montis atque dixerunt

parati sumus ascendere ad locum de quo Dominus locutus est quia

peccavimus

₄₁quibus Moses cur inquit transgredimini verbum Domini

quod vobis non cedet in prosperum

₄₂nolite ascendere non enim est Dominus vobiscum

ne corruatis coram inimicis vestris

₄₃Amalechites et Chananeus ante vos sunt quorum gladio corruetis

eo quod nolueritis adquiescere Domino

nec erit Dominus vobiscum

₄₄at illi contenebrati ascenderunt in verticem montis

arca autem testamenti Domini et Moses non recesserunt de castris

₄₅descenditque Amalechites et Chananeus qui habitabant

in monte

et percutiens eos atque concidens

persecutus est usque Horma