NAUM PROPHETA 3

₁vae civitas sanguinum universa mendacii dilaceratione plena

non recedet a te rapina

₂vox flagelli et vox impetus rotae

et equi frementis et quadrigae ferventis

equitis ascendentis

₃et micantis gladii

et fulgurantis hastae et multitudinis interfectae

et gravis ruinae nec est finis cadaverum

et corruent in corporibus suis

₄propter multitudinem fornicationum meretricis

speciosae et gratae et habentis maleficia

quae vendidit gentes in fornicationibus suis

et familias in maleficiis suis

₅ecce ego ad te dicit Dominus exercituum

et revelabo pudenda tua in facie tua

et ostendam gentibus nuditatem tuam

et regnis ignominiam tuam

₆et proiciam super te abominationes et contumeliis te adficiam

et ponam te in exemplum

₇et erit omnis qui viderit te resiliet a te

et dicet vastata est Nineve

quis commovebit super te caput

unde quaeram consolatorem tibi

₈numquid melior es ab Alexandria populorum

quae habitat in fluminibus

aqua in circuitu eius cuius divitiae mare aquae muri eius

₉Aethiopia fortitudo et Aegyptus et non est finis

Africa et Lybies fuerunt in auxilio tuo

₁₀sed et ipsa in transmigrationem ducta est in captivitatem

parvuli eius elisi sunt in capite omnium viarum

et super inclitos eius miserunt sortem

et omnes optimates eius confixi sunt in conpedibus

₁₁et tu ergo inebriaberis eris despecta

et tu quaeres auxilium ab inimico

₁₂omnes munitiones tuae sicuti ficus cum grossis suis

si concussae fuerint cadent in os comedentis

₁₃ecce populus tuus mulieres in medio tui

inimicis tuis adapertione pandentur portae terrae tuae

devorabit ignis vectes tuos

₁₄aquam propter obsidionem hauri tibi extrue munitiones tuas

intra in lutum et calca subigens tene laterem

₁₅ibi comedet te ignis peribis gladio devorabit te ut bruchus

congregare ut bruchus multiplicare ut lucusta

₁₆plures fecisti negotiationes tuas quam stellae sunt caeli

bruchus expansus est et avolavit

₁₇custodes tui quasi lucustae

et parvuli tui quasi lucustae lucustarum

quae considunt in sepibus in die frigoris

sol ortus est et avolaverunt

et non est cognitus locus earum ubi fuerint

₁₈dormitaverunt pastores tui rex Assur sepelientur principes tui

latitavit populus tuus in montibus et non est qui congreget

₁₉non est obscura contritio tua pessima est plaga tua

omnes qui audierunt auditionem tuam conpresserunt manum super te

quia super quem non transiit malitia tua

semper