LIBER LEVITICI 5

₁si peccaverit anima et audierit vocem iurantis testisque fuerit

quod aut ipse vidit aut conscius est

nisi indicaverit portabit iniquitatem suam

₂anima quae tetigerit aliquid inmundum

sive quod occisum a bestia est aut per se mortuum

vel quodlibet aliud reptile

et oblita fuerit inmunditiae suae rea est et deliquit

₃et si tetigerit quicquam de inmunditia hominis

iuxta omnem inpuritatem qua pollui solet

oblitaque cognoverit postea subiacebit delicto

₄anima quae iuraverit et protulerit labiis suis

ut vel male quid faceret vel bene

et id ipsum iuramento et sermone firmaverit

oblitaque postea intellexerit delictum suum

₅agat paenitentiam pro peccato

₆et offerat agnam de gregibus sive capram

orabitque pro eo sacerdos et pro peccato eius

₇sin autem non potuerit offerre pecus

offerat duos turtures vel duos pullos columbarum

Domino

unum pro peccato et alterum in holocaustum

₈dabitque eos sacerdoti

qui primum offerens pro peccato

retorquebit caput eius ad pinnulas

ita ut collo hereat et non penitus abrumpatur

₉et asperget de sanguine eius parietem altaris

quicquid autem reliquum fuerit

faciet destillare ad fundamentum eius quia pro peccato est

₁₀alterum vero adolebit holocaustum ut fieri solet

rogabitque pro eo sacerdos et pro peccato eius et dimittetur ei

₁₁quod si non quiverit manus eius offerre duos turtures vel

duos pullos columbae

offeret pro peccato similam partem

oephi decimam

non mittet in eam oleum nec turis aliquid inponet

quia pro peccato est

₁₂tradetque eam sacerdoti qui plenum ex toto pugillum

hauriens

cremabit super altare in monumentum eius qui obtulit

₁₃rogans pro illo et expians

reliquam vero partem ipse habebit in munere

₁₄locutus est Dominus ad Mosen dicens

₁₅anima si praevaricans caerimonias per errorem

in his quae Domino sunt sanctificata peccaverit

offeret pro delicto suo arietem inmaculatum de gregibus

qui emi potest duobus siclis iuxta pondus sanctuarii

₁₆ipsumque quod intulit damni restituet

et quintam partem ponet supra tradens sacerdoti

qui rogabit pro eo offerens arietem et dimittetur ei

₁₇anima si peccaverit per ignorantiam

feceritque unum ex his quae Domini lege prohibentur

et peccati rea intellexerit iniquitatem suam

₁₈offeret arietem inmaculatum de gregibus sacerdoti

iuxta mensuram aestimationemque peccati

qui orabit pro eo quod nesciens fecerit et dimittetur

ei

₁₉quia per errorem deliquit in Dominum