LIBER LEVITICI 26

₁ego Dominus Deus vester non facietis vobis idolum et sculptile

nec titulos erigetis

nec insignem lapidem ponetis in terra vestra ut adoretis eum

ego enim sum Dominus Deus vester

₂custodite sabbata mea

et pavete ad sanctuarium meum ego Dominus

₃si in praeceptis meis ambulaveritis

et mandata mea custodieritis et feceritis ea

dabo vobis pluvias temporibus suis

₄et terra gignet germen suum et pomis arbores replebuntur

₅adprehendet messium tritura vindemiam

et vindemia occupabit sementem

et comedetis panem vestrum in saturitatem

et absque pavore habitabitis in terra vestra

₆dabo pacem in finibus vestris dormietis et non erit qui exterreat

auferam malas bestias et gladius non transibit terminos vestros

₇persequemini inimicos vestros et corruent coram

vobis

₈persequentur quinque de vestris centum alienos

et centum ex vobis decem milia

cadent inimici vestri in conspectu vestro gladio

₉respiciam vos et crescere faciam

multiplicabimini et firmabo pactum meum vobiscum

₁₀comedetis vetustissima veterum

et vetera novis supervenientibus proicietis

₁₁ponam tabernaculum meum in medio vestri

et non abiciet vos anima mea

₁₂ambulabo inter vos et ero vester Deus

vosque eritis populus meus

₁₃ego Dominus Deus vester

qui eduxi vos de terra Aegyptiorum ne serviretis eis

et qui confregi catenas cervicum vestrarum ut incederetis erecti

₁₄quod si non audieritis me nec feceritis omnia mandata mea

₁₅si spreveritis leges meas et iudicia mea contempseritis

ut non faciatis ea quae a me constituta sunt

et ad irritum perducatis pactum meum

₁₆ego quoque haec faciam vobis

visitabo vos velociter in egestate et ardore

qui conficiat oculos vestros et consumat animas

frustra seretis sementem quae ab hostibus devorabitur

₁₇ponam faciem meam contra vos

et corruetis coram hostibus vestris

et subiciemini his qui oderunt vos

fugietis nemine persequente

₁₈sin autem nec sic oboedieritis mihi

addam correptiones vestras septuplum propter peccata vestra

₁₉et conteram superbiam duritiae vestrae

daboque caelum vobis desuper sicut ferrum et terram aeneam

₂₀consumetur in cassum labor vester

non proferet terra germen nec arbores poma praebebunt

₂₁si ambulaveritis ex adverso mihi nec volueritis audire me

addam plagas vestras usque in septuplum propter

peccata vestra

₂₂emittamque in vos bestias agri

quae consumant et vos et pecora vestra

et ad paucitatem cuncta redigant desertaeque fiant viae vestrae

₂₃quod si nec sic volueritis recipere disciplinam

sed ambulaveritis ex adverso mihi

₂₄ego quoque contra vos adversus incedam

et percutiam vos septies propter peccata vestra

₂₅inducamque super vos gladium ultorem foederis mei

cumque confugeritis in urbes

mittam pestilentiam in medio vestri

et trademini hostium manibus

₂₆postquam confregero baculum panis vestri

ita ut decem mulieres in uno clibano coquant panes

et reddant eos ad pondus

et comedetis et non saturabimini

₂₇sin autem nec per haec audieritis me sed ambulaveritis contra me

₂₈et ego incedam adversum vos in furore contrario

et corripiam vos septem plagis propter peccata vestra

₂₉ita ut comedatis carnes filiorum et filiarum

vestrarum

₃₀destruam excelsa vestra et simulacra confringam

cadetis inter ruinas idolorum vestrorum

et abominabitur vos anima mea

₃₁in tantum ut urbes vestras redigam in solitudinem

et deserta faciam sanctuaria vestra

nec recipiam ultra odorem suavissimum

₃₂disperdamque terram vestram

et stupebunt super ea inimici vestri

cum habitatores illius fuerint

₃₃vos autem dispergam in gentes et evaginabo post vos gladium

eritque terra vestra deserta et civitates dirutae

₃₄tunc placebunt terrae sabbata sua cunctis diebus

solitudinis suae

quando fueritis

₃₅in terra hostili

sabbatizabit et requiescet in sabbatis solitudinis suae

eo quod non requieverit in sabbatis vestris

quando habitabatis in ea

₃₆et qui de vobis remanserint

dabo pavorem in cordibus eorum in regionibus hostium

terrebit eos sonitus folii volantis et ita fugient quasi gladium

cadent nullo sequente

₃₇et corruent singuli super fratres suos quasi bella fugientes

nemo vestrum inimicis audebit resistere

₃₈peribitis inter gentes et hostilis vos terra consumet

₃₉quod si et de his aliqui remanserint

tabescent in iniquitatibus suis in terra inimicorum suorum

et propter peccata patrum suorum et sua adfligentur

₄₀donec confiteantur iniquitates suas et maiorum suorum

quibus praevaricati sunt in me

et ambulaverunt ex adverso mihi

₄₁ambulabo igitur et ego contra eos

et inducam illos in terram hostilem

donec erubescat incircumcisa mens eorum

tunc orabunt pro impietatibus suis

₄₂et recordabor foederis mei

quod pepigi cum Iacob et Isaac et Abraham

terrae quoque memor ero

₄₃quae cum relicta fuerit ab eis

conplacebit sibi in sabbatis suis patiens solitudinem propter illos

ipsi vero rogabunt pro peccatis suis

eo quod abiecerint iudicia mea et leges meas despexerint

₄₄et tamen etiam cum essent in terra

hostili

non penitus abieci eos

neque sic despexi ut consumerentur

et irritum facerem pactum meum cum eis

ego enim sum Dominus Deus eorum

₄₅et recordabor foederis mei pristini

quando eduxi eos de terra Aegypti in conspectu gentium

ut essem Deus eorum ego Dominus Deus

haec sunt praecepta atque iudicia et leges

quas dedit Dominus inter se et inter

filios Israhel in monte Sinai per manum

Mosi