LIBER LEVITICI 25

₁locutusque est Dominus ad Mosen in monte Sinai dicens

₂loquere filiis Israhel et dices ad eos

quando ingressi fueritis terram quam ego dabo vobis

sabbatizet sabbatum Domini

₃sex annis seres agrum tuum

et sex annis putabis vineam tuam colligesque fructus eius

₄septimo autem anno sabbatum erit terrae requietionis Domini

agrum non seres et vineam non putabis

₅quae sponte gignit humus non metes

et uvas primitiarum tuarum non colliges quasi vindemiam

annus enim requietionis terrae est

₆sed erunt vobis in cibum

tibi et servo tuo ancillae et mercennario tuo

et advenae qui peregrinantur apud te

₇iumentis tuis et pecoribus

omnia quae nascuntur praebebunt cibum

₈numerabis quoque tibi septem ebdomades annorum

id est septem septies

quae simul faciunt annos quadraginta novem

₉et clanges bucina mense septimo decima

die mensis

propitiationis tempore in universa terra vestra

₁₀sanctificabisque annum quinquagesimum

et vocabis remissionem cunctis habitatoribus terrae tuae

ipse est enim iobeleus

revertetur homo ad possessionem suam

et unusquisque rediet ad familiam

pristinam

₁₁quia iobeleus est et quinquagesimus annus

non seretis neque metetis

sponte in agro nascentia et primitias vindemiae non colligetis

₁₂ob sanctificationem iobelei

sed statim ablata comedetis

₁₃anno iobelei redient omnes ad possessiones suas

₁₄quando vendes quippiam civi tuo vel emes ab eo

ne contristes fratrem tuum

sed iuxta numerum annorum iobelei emes ab eo

₁₅et iuxta supputationem frugum vendet tibi

₁₆quanto plus anni remanserint post iobeleum

tanto crescet et pretium

et quanto minus temporis numeraveris

tanto minoris et emptio constabit

tempus enim frugum vendet tibi

₁₇nolite adfligere contribules vestros

sed timeat unusquisque Deum suum quia ego Dominus Deus vester

₁₈facite praecepta mea et iudicia custodite et implete ea

ut habitare possitis in terra absque ullo pavore

₁₉et gignat vobis humus fructus suos

quibus vescamini usque ad saturitatem nullius impetum formidantes

₂₀quod si dixeritis quid comedemus anno septimo

si non seruerimus neque collegerimus fruges

nostras

₂₁dabo benedictionem meam vobis anno sexto

et faciet fructus trium annorum

₂₂seretisque anno octavo

et comedetis veteres fruges usque ad nonum annum

donec nova nascantur edetis vetera

₂₃terra quoque non veniet in

perpetuum

quia mea est et vos advenae et coloni mei estis

₂₄unde cuncta regio possessionis vestrae

sub redemptionis condicione vendetur

₂₅si adtenuatus frater tuus vendiderit possessiunculam suam

et voluerit propinquus eius potest redimere quod

ille vendiderat

₂₆sin autem non habuerit proximum

et ipse pretium ad redimendum potuerit invenire

₂₇conputabuntur fructus ex eo tempore quo vendidit

et quod reliquum est reddet emptori

sicque recipiet possessionem suam

₂₈quod si non invenerit manus eius ut reddat pretium

habebit emptor quod emerat usque ad annum iobeleum

in ipso enim omnis venditio redit ad

dominum et ad possessorem pristinum

₂₉qui vendiderit domum intra urbis muros

habebit licentiam redimendi donec unus impleatur annus

₃₀si non redemerit et anni circulus fuerit evolutus

emptor possidebit eam et posteri eius in perpetuum

et redimi non poterit etiam in iobeleo

₃₁sin autem in villa fuerit domus quae muros non habet

agrorum iure vendetur

si ante redempta non fuerit in iobeleo revertetur ad dominum

₃₂aedes Levitarum quae in urbibus sunt semper possunt redimi

₃₃si redemptae non fuerint in iobeleo revertentur ad dominos

quia domus urbium leviticarum pro possessionibus

sunt inter filios Israhel

₃₄suburbana autem eorum non venient

quia possessio sempiterna est

₃₅si adtenuatus fuerit frater tuus et infirmus manu

et susceperis eum quasi advenam et peregrinum et vixerit tecum

₃₆ne accipias usuras ab eo nec amplius quam

dedisti

time Deum tuum ut vivere possit frater tuus apud te

₃₇pecuniam tuam non dabis ei ad usuram

et frugum superabundantiam non exiges

₃₈ego Dominus Deus vester qui eduxi vos de terra Aegypti

ut darem vobis terram Chanaan et essem vester Deus

₃₉si paupertate conpulsus vendiderit se tibi frater tuus

non eum opprimes servitute famulorum

₄₀sed quasi mercennarius et colonus erit

usque ad annum iobeleum operabitur apud te

₄₁et postea egredietur cum liberis suis

et revertetur ad cognationem et ad possessionem patrum suorum

₄₂mei enim servi sunt et ego eduxi eos de terra Aegypti

non venient condicione servorum

₄₃ne adfligas eum per potentiam sed metuito Deum tuum

₄₄servus et ancilla sint vobis de nationibus quae in circuitu vestro sunt

₄₅et de advenis qui peregrinantur apud vos

vel qui ex his nati fuerint in terra vestra

hos habebitis famulos

₄₆et hereditario iure transmittetis ad posteros ac possidebitis in

aeternum

fratres autem vestros filios Israhel ne opprimatis per potentiam

₄₇si invaluerit apud vos manus advenae atque peregrini

et adtenuatus frater tuus vendiderit se ei aut cuiquam de stirpe eius

₄₈post venditionem potest redimi

qui voluerit ex fratribus suis redimet eum

₄₉et patruus et patruelis et consanguineus et adfinis

sin autem et ipse potuerit redimet se

₅₀supputatis dumtaxat annis

a tempore venditionis suae usque ad annum iobeleum

et pecunia qua venditus fuerat

iuxta annorum numerum et rationem mercennarii supputata

₅₁si plures fuerint anni qui remanent usque ad iobeleum

secundum hos reddet et pretium

₅₂si pauci ponet rationem cum eo iuxta annorum numerum

et reddet emptori quod reliquum est annorum

₅₃quibus ante servivit mercedibus inputatis

non adfliget eum violenter in conspectu tuo

₅₄quod si per haec redimi non potuerit

anno iobeleo egredietur cum liberis suis

₅₅mei sunt enim servi filii Israhel quos eduxi de

terra Aegypti