LIBER LEVITICI 27

₁locutusque est Dominus ad Mosen dicens

₂loquere filiis Israhel et dices ad eos

homo qui votum fecerit et spoponderit Deo animam suam

sub aestimatione dabit pretium

₃si fuerit masculus

a vicesimo usque ad sexagesimum annum

dabit quinquaginta siclos argenti ad mensuram sanctuarii

₄si mulier triginta

₅a quinto autem anno usque ad vicesimum

masculus dabit viginti siclos femina decem

₆ab uno mense usque ad annum quintum

pro masculo dabuntur quinque sicli pro femina tres

₇sexagenarius et ultra masculus dabit quindecim siclos femina decem

₈si pauper fuerit et aestimationem reddere non valebit

stabit coram sacerdote

et quantum ille aestimaverit et viderit eum posse reddere tantum dabit

₉animal autem quod immolari potest Domino

si quis voverit sanctum erit

₁₀et mutari non poterit id est nec melius malo nec peius bono

quod si mutaverit

et ipsum quod mutatum est et illud pro quo mutatum est

consecratum erit Domino

₁₁animal inmundum quod immolari Domino non potest

si quis voverit adducetur ante sacerdotem

₁₂qui diiudicans utrum bonum an malum sit statuet pretium

₁₃quod si dare voluerit is qui offert

addet supra aestimationis quintam

partem

₁₄homo si voverit domum suam et sanctificaverit Domino

considerabit eam sacerdos utrum bona an mala sit

et iuxta pretium quod ab eo fuerit constitutum venundabitur

₁₅sin autem ille qui voverat voluerit redimere eam

dabit quintam partem aestimationis supra et habebit domum

₁₆quod si agrum possessionis suae voverit et consecraverit Domino

iuxta mensuram sementis aestimabitur pretium

si triginta modiis hordei seritur terra

quinquaginta siclis veniet

argenti

₁₇si statim ab anno incipientis iobelei voverit agrum

quanto valere potest tanto aestimabitur

₁₈sin autem post aliquantum temporis

supputabit sacerdos pecuniam

iuxta annorum qui reliqui sunt numerum usque ad iobeleum

et detrahetur ex pretio

₁₉quod si voluerit redimere agrum ille qui voverat

addet quintam partem aestimatae pecuniae et possidebit eum

₂₀sin autem noluerit redimere sed alteri cuilibet fuerit venundatus

ultra eum qui voverat redimere non poterit

₂₁quia cum iobelei venerit dies sanctificatus erit Domino

et possessio consecrata ad ius pertinet sacerdotum

₂₂si ager emptus et non de possessione maiorum sanctificatus fuerit Domino

₂₃supputabit sacerdos iuxta annorum numerum usque ad iobeleum pretium

et dabit ille qui voverat eum Domino

₂₄in iobeleo autem revertetur ad priorem dominum qui vendiderat eum

et habuerat in sortem possessionis suae

₂₅omnis aestimatio siclo sanctuarii ponderabitur

siclus viginti obolos habet

₂₆primogenita quae ad Dominum pertinent

nemo sanctificare poterit et vovere

sive bos sive ovis fuerit Domini sunt

₂₇quod si inmundum est animal

redimet qui obtulit iuxta aestimationem tuam

et addet quintam partem pretii

si redimere noluerit vendetur alteri

quantocumque a te fuerit aestimatum

₂₈omne quod Domino consecratur

sive homo fuerit sive animal sive ager

non veniet nec redimi

poterit

quicquid semel fuerit consecratum sanctum sanctorum erit Domino

₂₉et omnis consecratio quae offertur ab homine

non redimetur sed morte morietur

₃₀omnes decimae terrae sive de frugibus sive de pomis arborum

Domini sunt et illi sanctificantur

₃₁si quis autem voluerit redimere decimas suas

addet quintam partem earum

₃₂omnium decimarum boves et oves et caprae

quae sub pastoris virga transeunt

quicquid decimum venerit sanctificabitur Domino

₃₃non eligetur nec bonum nec malum nec altero commutabitur

si quis mutaverit

et quod mutatum est et pro quo mutatum est

sanctificabitur Domino et non redimetur

₃₄haec sunt praecepta quae mandavit Dominus Mosi

ad filios Israhel in monte Sinai