LIBER LEVITICI 15

₁locutusque est Dominus ad Mosen et Aaron dicens

₂loquimini filiis Israhel et dicite eis

vir qui patitur fluxum seminis inmundus erit

₃et tunc iudicabitur huic vitio subiacere

cum per momenta singula adheserit carni illius atque concreverit foedus humor

₄omne stratum in quo dormierit inmundum erit

et ubicumque sederit

₅si quis hominum tetigerit lectum eius

lavabit vestimenta sua

et ipse lotus aqua inmundus erit usque ad vesperum

₆si sederit ubi ille sederat et ipse lavabit vestimenta sua

et lotus aqua inmundus erit usque ad vesperum

₇qui tetigerit carnem eius lavabit vestimenta sua

et ipse lotus aqua inmundus erit usque ad vesperum

₈si salivam huiuscemodi homo iecerit super eum qui mundus est

lavabit vestem suam

et lotus aqua inmundus erit usque ad vesperum

₉sagma super quo sederit inmundum erit

₁₀et quicquid sub eo fuerit qui fluxum seminis patitur

pollutum erit usque ad vesperum

qui portaverit horum aliquid

lavabit vestem suam

et ipse lotus aqua inmundus erit usque ad vesperum

₁₁omnis quem tetigerit qui talis est

non lotis ante manibus

lavabit vestimenta sua

et lotus aqua inmundus erit usque ad vesperum

₁₂vas fictile quod tetigerit confringetur

vas autem ligneum lavabitur aqua

₁₃si sanatus fuerit qui huiuscemodi sustinet passionem

numerabit septem dies post emundationem sui

et lotis vestibus ac toto corpore in aquis viventibus erit

mundus

₁₄die autem octavo sumet duos turtures aut duos pullos columbae

et veniet in conspectu Domini

ad ostium tabernaculi testimonii

dabitque eos sacerdoti

₁₅qui faciet unum pro peccato et alterum in holocaustum

rogabitque pro eo coram Domino ut emundetur a fluxu seminis sui

₁₆vir de quo egreditur semen coitus lavabit aqua omne corpus suum

et inmundus erit usque ad vesperum

₁₇vestem et pellem quam habuerit lavabit aqua

et inmunda erit usque ad vesperum

₁₈mulier cum qua coierit lavabitur aqua

et inmunda erit usque ad vesperum

₁₉mulier quae redeunte mense patitur fluxum sanguinis

septem diebus separabitur

₂₀omnis qui tetigerit eam inmundus erit usque ad vesperum

₂₁et in quo dormierit vel sederit diebus separationis suae polluetur

₂₂qui tetigerit lectum eius lavabit vestimenta sua

et ipse lotus aqua inmundus erit usque ad vesperum

₂₃omne vas super quo illa sederit

quisquis adtigerit

lavabit vestimenta sua

et lotus aqua pollutus erit usque ad vesperum

₂₄si coierit cum ea vir tempore sanguinis menstrualis

inmundus erit septem diebus

et omne stratum in quo dormierit polluetur

₂₅mulier quae patitur multis diebus fluxum sanguinis

non in tempore menstruali

vel quae post menstruum sanguinem fluere non cessat

quamdiu huic subiacet passioni

inmunda erit quasi sit in tempore menstruo

₂₆omne stratum in quo dormierit et vas in quo sederit pollutum erit

₂₇quicumque tetigerit eam lavabit vestimenta sua

et ipse lotus aqua inmundus erit usque ad vesperum

₂₈si steterit sanguis et fluere cessarit

numerabit septem dies purificationis suae

₂₉et octavo die offeret pro se sacerdoti

duos turtures vel duos pullos columbae

ad ostium tabernaculi testimonii

₃₀qui unum faciet pro peccato et alterum in holocaustum

rogabitque pro ea coram Domino

et pro fluxu inmunditiae eius

₃₁docebitis ergo filios Israhel ut caveant inmunditiam

et non moriantur in sordibus suis

cum polluerint tabernaculum meum quod est inter eos

₃₂ista est lex eius qui patitur fluxum seminis et qui polluitur coitu

₃₃et quae menstruis temporibus separatur

vel quae iugi fluit sanguine

et hominis qui dormierit cum ea