LIBER LEVITICI 12

₁locutus est Dominus ad Mosen dicens

₂loquere filiis Israhel et dices ad eos

mulier si suscepto semine pepererit masculum

inmunda erit septem diebus iuxta dies separationis menstruae

₃et die octavo circumcidetur infantulus

₄ipsa vero triginta tribus diebus manebit in sanguine purificationis suae

omne sanctum non tanget

nec ingredietur sanctuarium

donec impleantur dies purificationis eius

₅sin autem feminam pepererit

inmunda erit duabus ebdomadibus iuxta ritum fluxus menstrui

et sexaginta ac sex diebus manebit in sanguine

purificationis suae

₆cumque expleti fuerint dies purificationis eius pro filio sive pro filia

deferet agnum anniculum in holocaustum

et pullum columbae sive turturem pro peccato

ad ostium tabernaculi testimonii et tradet sacerdoti

₇qui offeret illa coram Domino et rogabit pro ea

et sic mundabitur a profluvio sanguinis sui

ista est lex parientis masculum ac feminam

₈quod si non invenerit manus eius

nec potuerit offerre agnum

sumet duos turtures vel duos pullos columbae

unum in holocaustum et alterum pro peccato

orabitque pro ea sacerdos et sic mundabitur