LIBER LEVITICI 11

₁locutus est Dominus ad Mosen et Aaron dicens

₂dicite filiis Israhel haec sunt animalia quae comedere debetis

de cunctis animantibus terrae

₃omne quod habet divisam ungulam et ruminat in pecoribus comedetis

₄quicquid autem ruminat quidem et habet ungulam

sed non dividit eam sicut camelus et cetera

non comedetis illud et inter inmunda reputabitis

₅chyrogryllius qui ruminat ungulamque non dividit

inmundus est

₆lepus quoque nam et ipse ruminat sed ungulam non dividit

₇et sus qui cum ungulam dividat non ruminat

₈horum carnibus non vescemini nec cadavera contingetis

quia inmunda sunt vobis

₉haec sunt quae gignuntur in aquis et vesci licitum est

omne quod habet pinnulas et squamas

tam in mari quam in fluminibus et stagnis comedetis

₁₀quicquid autem pinnulas et squamas non habet

eorum quae in aquis moventur et vivunt

abominabile vobis

₁₁et execrandum erit

carnes eorum non comedetis et morticina vitabitis

₁₂cuncta quae non habent pinnulas et squamas in aquis polluta erunt

₁₃haec sunt quae de avibus comedere non debetis

et vitanda sunt vobis

aquilam et grypem et alietum

₁₄milvum ac vulturem iuxta genus suum

₁₅et omne corvini generis in similitudinem suam

₁₆strutionem et noctuam et larum et accipitrem iuxta genus suum

₁₇bubonem et mergulum et ibin

₁₈cycnum et onocrotalum et porphirionem

₁₉erodionem et charadrion iuxta genus suum

opupam quoque et vespertilionem

₂₀omne de volucribus quod graditur super quattuor pedes

abominabile erit vobis

₂₁quicquid autem ambulat quidem super quattuor pedes

sed habet longiora retro crura per quae salit super terram

₂₂comedere debetis

ut est brucus in genere suo

et attacus atque ophiomachus ac lucusta

singula iuxta genus suum

₂₃quicquid autem ex volucribus quattuor tantum habet pedes

execrabile erit vobis

₂₄et quicumque morticina eorum tetigerit polluetur

et erit inmundus usque ad vesperum

₂₅et si necesse fuerit ut portet quippiam horum mortuum

lavabit vestimenta sua

et inmundus erit usque ad solis occasum

₂₆omne animal quod habet quidem ungulam

sed non dividit eam nec ruminat inmundum erit

et quicquid tetigerit illud contaminabitur

₂₇quod ambulat super manus ex cunctis animantibus quae incedunt

quadrupedia inmundum erit

qui tetigerit morticina eorum polluetur usque ad vesperum

₂₈et qui portaverit huiuscemodi cadavera lavabit vestimenta sua

et inmundus erit usque ad vesperum

quia omnia haec inmunda sunt vobis

₂₉hoc quoque inter polluta reputabitur

de his quae moventur in terra

mustela et mus et corcodillus singula iuxta genus suum

₃₀migale et cameleon et stelio ac lacerta et talpa

₃₁omnia haec inmunda sunt

qui tetigerit morticina eorum inmundus erit usque ad vesperum

₃₂et super quod ceciderit quicquam de morticinis eorum polluetur

tam vas ligneum et vestimentum quam pelles et cilicia

et in quocumque fit opus

tinguentur aqua et polluta erunt usque ad vesperum

et sic postea mundabuntur

₃₃vas autem fictile in quo horum quicquam intro ceciderit

polluetur

et idcirco frangendum est

₃₄omnis cibus quem comeditis

si fusa fuerit super eum aqua inmundus erit

et omne liquens quod bibitur de universo vase inmundum erit

₃₅et quicquid de morticinis istiusmodi

ceciderit super illud inmundum erit

sive clibani sive cytropodes destruentur et inmundi erunt

₃₆fontes vero et cisternae et omnis aquarum congregatio munda erit

qui morticinum eorum tetigerit polluetur

₃₇si ceciderint super sementem non polluent eam

₃₈sin autem quispiam aqua sementem perfuderit

et postea morticinis tacta fuerit ilico polluetur

₃₉si mortuum fuerit animal quod licet vobis comedere

qui cadaver eius tetigerit inmundus erit usque ad vesperum

₄₀et qui comederit ex eo quippiam sive portaverit

lavabit vestimenta sua et inmundus erit usque ad vesperum

₄₁omne quod reptat super terram abominabile erit

nec adsumetur in cibum

₄₂quicquid super pectus quadrupes graditur

et multos habet pedes sive per humum trahitur

non comedetis quia abominabile est

₄₃nolite contaminare animas vestras

nec tangatis quicquam eorum ne inmundi sitis

₄₄ego enim sum Dominus Deus vester

sancti estote quoniam et ego sanctus sum

ne polluatis animas vestras in omni reptili quod movetur super terram

₄₅ego sum Dominus qui eduxi vos de terra Aegypti

ut essem vobis in Deum

sancti eritis quia et ego sanctus sum

₄₆ista est lex animantium et volucrum et omnis animae

viventis

quae movetur in aqua et reptat in terra

₄₇ut differentias noveritis mundi et inmundi

et sciatis quid comedere et quid respuere debeatis