LIBER LEVITICI 13

₁locutus est Dominus ad Mosen et Aaron dicens

₂homo in cuius carne et cute ortus fuerit diversus

color

sive pustula aut quasi lucens quippiam id est plaga leprae

adducetur ad Aaron sacerdotem vel ad unum quemlibet filiorum eius

₃qui cum viderit lepram in cute et pilos in album mutatos colorem

ipsamque speciem leprae humiliorem cute et carne reliqua

plaga leprae est et ad arbitrium eius separabitur

₄sin autem lucens candor fuerit in cute nec humilior carne reliqua

et pili coloris pristini

recludet eum sacerdos septem diebus

₅et considerabit die septimo

et siquidem lepra ultra non creverit

nec transierit in cute priores terminos

rursum includet eum septem diebus aliis

₆et die septimo contemplabitur

si obscurior fuerit lepra et non creverit in cute

mundabit eum quia scabies est

lavabitque homo vestimenta sua et mundus erit

₇quod si postquam a sacerdote visus est et redditus munditiae

iterum lepra creverit

adducetur ad eum

₈et inmunditiae condemnabitur

₉plaga leprae si fuerit in homine

adducetur ad sacerdotem

₁₀et videbit eum

cumque color albus in cute fuerit

et capillorum mutarit aspectum

ipsa quoque caro viva apparuerit

₁₁lepra vetustissima iudicabitur atque inolita cuti

contaminabit itaque eum sacerdos et non recludet

quia perspicue inmunditia est

₁₂sin autem effloruerit discurrens lepra

in cute

et operuerit omnem carnem a capite usque ad pedes

quicquid sub aspectu oculorum cadit

₁₃considerabit eum sacerdos et teneri lepra mundissima iudicabit

eo quod omnis in candorem versa sit

et idcirco homo mundus erit

₁₄quando vero caro vivens in eo apparuerit

₁₅tunc sacerdotis iudicio polluetur et inter inmundos reputabitur

caro enim viva si lepra aspergatur inmunda est

₁₆quod si rursum versa fuerit in alborem

et totum hominem operuerit

₁₇considerabit eum sacerdos et mundum esse decernet

₁₈caro et cutis in qua ulcus natum est et sanatum

₁₉et in loco ulceris cicatrix apparuerit alba sive

subrufa

adducetur homo ad sacerdotem

₂₀qui cum viderit locum leprae humiliorem carne reliqua

et pilos versos in candorem contaminabit eum

plaga enim leprae orta est in ulcere

₂₁quod si pilus coloris est pristini

et cicatrix subobscura et vicina carne non est humilior

recludet eum septem diebus

₂₂et siquidem creverit adiudicabit eum leprae

₂₃sin autem steterit in loco suo ulceris est cicatrix et homo mundus erit

₂₄caro et cutis quam ignis exuserit

et sanata albam sive rufam habuerit cicatricem

₂₅considerabit eam sacerdos

et ecce versa est in alborem et locus eius reliqua cute

humilior

contaminabit eum quia plaga leprae in cicatrice orta est

₂₆quod si pilorum color non fuerit inmutatus

nec humilior plaga carne reliqua

et ipsa leprae species fuerit subobscura

recludet eum septem diebus

₂₇et die septimo contemplabitur

si creverit in cute lepra contaminabit eum

₂₈sin autem in loco suo candor steterit non satis clarus

plaga conbustionis est

et idcirco mundabitur quia cicatrix est conbusturae

₂₉vir sive mulier in cuius capite vel barba germinarit lepra

videbit eos sacerdos

₃₀et siquidem humilior fuerit locus carne reliqua

et capillus flavus solitoque subtilior

contaminabit eos quia lepra capitis ac barbae est

₃₁sin autem viderit et locum maculae aequalem vicinae carni

et capillum nigrum

recludet eos septem diebus

₃₂et die septimo intuebitur

si non creverit macula et capillus sui coloris est

et locus plagae carni reliquae aequalis

₃₃radetur homo absque loco maculae et includetur septem diebus aliis

₃₄si die septimo visa fuerit stetisse plaga in loco suo

nec humilior carne reliqua mundabit eum

lotisque vestibus mundus erit

₃₅sin autem post emundationem rursus creverit macula in cute

₃₆non quaeret amplius utrum capillus in flavum colorem sit commutatus

quia aperte inmundus est

₃₇porro si steterit macula et capilli nigri fuerint

noverit hominem esse sanatum

et confidenter eum pronuntiet mundum

₃₈vir et mulier in cuius cute candor apparuerit

₃₉intuebitur eos sacerdos

si deprehenderit subobscurum alborem lucere in cute

sciat non esse lepram sed maculam coloris candidi et hominem mundum

₄₀vir de cuius capite capilli fluunt calvus ac

mundus est

₄₁et si a fronte ceciderint pili recalvaster et mundus est

₄₂sin autem in calvitio sive in recalvatione

albus vel rufus color fuerit exortus

₄₃et hoc sacerdos viderit condemnabit eum

haut dubiae leprae quae orta est in calvitio

₄₄quicumque ergo maculatus fuerit lepra

et separatus ad arbitrium sacerdotis

₄₅habebit vestimenta dissuta caput nudum os veste contectum

contaminatum ac sordidum se clamabit

₄₆omni tempore quo leprosus est et inmundus

solus habitabit extra castra

₄₇vestis lanea sive linea

quae lepram habuerit

₄₈in stamine atque subtemine

aut certe pellis vel quicquid ex pelle confectum est

₄₉si alba aut rufa macula fuerit infecta

lepra reputabitur ostendeturque sacerdoti

₅₀qui consideratam recludet septem diebus

₅₁et die septimo rursus aspiciens

si crevisse deprehenderit lepra perseverans est

pollutum iudicabit vestimentum et omne in quo fuerit inventa

₅₂et idcirco conburetur flammis

₅₃quod si eam viderit non crevisse

₅₄praecipiet et lavabunt id in quo lepra est

recludetque illud septem diebus aliis

₅₅et cum viderit faciem quidem pristinam non reversam

nec tamen crevisse lepram

inmundum iudicabit et igne conburet

eo quod infusa sit in superficie vestimenti vel per totum lepra

₅₆sin autem obscurior fuerit locus leprae postquam vestis est lota

abrumpet eum et a solido dividet

₅₇quod si ultra apparuerit in his locis quae prius inmaculata erant

lepra volatilis et vaga debet igne conburi

₅₈si cessaverit lavabit ea quae pura sunt secundo et munda

erunt

₅₉ista est lex leprae

vestimenti lanei et linei staminis atque subteminis omnisque

supellectilis pelliciae

quomodo mundari debeat vel contaminari