LIBER LEVITICI 10

₁arreptisque Nadab et Abiu filii Aaron turibulis

posuerunt ignem et incensum desuper

offerentes coram Domino ignem alienum

quod eis praeceptum non erat

₂egressusque ignis a Domino devoravit eos

et mortui sunt coram Domino

₃dixitque Moses ad Aaron hoc est quod locutus est Dominus

sanctificabor in his qui adpropinquant mihi

et in conspectu omnis populi glorificabor

quod audiens tacuit Aaron

₄vocatis autem Moses Misahel et Elsaphan filios Ozihel patrui Aaron

ait ad eos

ite et colligite fratres vestros de conspectu

sanctuarii

et asportate extra castra

₅confestimque pergentes tulerunt eos

sicut iacebant vestitos lineis tunicis

et eiecerunt foras ut sibi fuerat imperatum

₆locutus est Moses ad Aaron et ad Eleazar atque

Ithamar filios eius

capita vestra nolite nudare et vestimenta nolite scindere

ne forte moriamini et super omnem coetum oriatur indignatio

fratres vestri et omnis domus Israhel plangant incendium quod

Dominus suscitavit

₇vos autem non egredimini fores tabernaculi

alioquin peribitis oleum quippe sanctae unctionis est super vos

qui fecerunt omnia iuxta praeceptum Mosi

₈dixit quoque Dominus ad Aaron

₉vinum et omne quod inebriare potest non bibetis tu et

filii tui

quando intratis tabernaculum testimonii ne

moriamini

quia praeceptum est sempiternum in generationes vestras

₁₀et ut habeatis scientiam discernendi inter sanctum et profanum

inter pollutum et mundum

₁₁doceatisque filios Israhel omnia legitima mea

quae locutus est Dominus ad eos per manum Mosi

₁₂locutusque est Moses ad Aaron et ad Eleazar atque Ithamar

filios eius qui residui erant

tollite sacrificium quod remansit de oblatione Domini

et comedite illud absque fermento iuxta altare

quia sanctum sanctorum est

₁₃comedetis autem in loco sancto

quod datum est tibi et filiis tuis de oblationibus Domini

sicut praeceptum est mihi

₁₄pectusculum quoque quod oblatum est

et armum qui separatus est

edetis in loco mundissimo

tu et filii tui ac filiae tuae tecum

tibi enim ac liberis tuis reposita sunt

de hostiis salutaribus filiorum Israhel

₁₅eo quod armum et pectus et adipes qui cremantur in altari

elevaverint coram

Domino

et pertineant ad te et ad filios tuos lege perpetua

sicut praecepit Dominus

₁₆inter haec hircum qui oblatus fuerat pro peccato

cum quaereret Moses exustum repperit

iratusque contra Eleazar et Ithamar filios Aaron qui remanserant ait

₁₇cur non comedistis hostiam pro peccato in loco sancto

quae sancta sanctorum est

et data vobis ut portetis iniquitatem multitudinis

et rogetis pro ea in conspectu Domini

₁₈praesertim cum de sanguine illius non sit inlatum intra sancta

et comedere eam debueritis in sanctuario

sicut praeceptum est mihi

₁₉respondit Aaron

oblata est hodie victima pro peccato et holocaustum coram Domino

mihi autem accidit quod vides

quomodo potui comedere eam

aut placere Domino in caerimoniis mente lugubri

₂₀quod cum audisset Moses recepit satisfactionem