LIBER IOSUE 1

₁Et factum est ut post mortem Mosi servi Domini loqueretur Dominus

ad Iosue filium Nun ministrum Mosi

et diceret ei

₂Moses servus meus mortuus est

surge et transi Iordanem istum tu et omnis populus tecum

in terram quam ego dabo filiis Israhel

₃omnem locum quem calcaverit vestigium pedis vestri vobis tradam

sicut locutus sum Mosi

₄a deserto et Libano usque ad fluvium magnum Eufraten

omnis terra Hettheorum usque ad mare Magnum contra solis occasum erit

terminus vester

₅nullus vobis poterit resistere cunctis diebus vitae tuae

sicut fui cum Mose ero et tecum

non dimittam nec derelinquam te

₆confortare et esto robustus

tu enim sorte divides populo huic terram

pro qua iuravi patribus suis ut

traderem eam illis

₇confortare igitur et esto robustus valde

ut custodias et facias omnem legem

quam praecepit tibi Moses servus meus

ne declines ab ea ad dextram vel ad sinistram

ut intellegas cuncta quae agis

₈non recedat volumen legis huius de ore tuo

sed meditaberis in eo diebus ac noctibus

ut custodias et facias omnia quae scripta sunt in eo

tunc diriges viam tuam et intelleges eam

₉ecce praecipio tibi confortare et esto robustus

noli metuere et noli timere

quoniam tecum est Dominus Deus tuus

in omnibus ad quaecumque perrexeris

₁₀praecepitque Iosue principibus populi dicens

transite per medium castrorum et imperate populo ac dicite

₁₁praeparate vobis cibaria

quoniam post diem tertium transibitis Iordanem

et intrabitis ad possidendam terram

quam Dominus Deus vester daturus est vobis

₁₂Rubenitis quoque et Gadditis et dimidiae tribui Manasse

ait

₁₃mementote sermonis quem praecepit vobis Moses famulus Domini dicens

Dominus Deus vester dedit vobis requiem et omnem terram

₁₄uxores vestrae et filii ac iumenta manebunt in terra

quam tradidit vobis Moses trans Iordanem

vos autem transite armati ante fratres vestros omnes fortes manu

et pugnate pro eis

₁₅donec det requiem Dominus fratribus vestris

sicut et vobis dedit

et possideant ipsi quoque terram

quam Dominus Deus vester daturus est eis

et sic revertemini in terram possessionis

vestrae

et habitabitis in ea

quam vobis dedit Moses famulus Domini

trans Iordanem contra solis ortum

₁₆responderuntque ad Iosue atque dixerunt

omnia quae praecepisti nobis faciemus et quocumque miseris ibimus

₁₇sicut oboedivimus in cunctis Mosi ita oboediemus et tibi

tantum sit Dominus Deus tecum sicut fuit cum Mose

₁₈qui contradixerit ori tuo

et non oboedierit cunctis sermonibus quos praeceperis ei moriatur

tu tantum confortare et viriliter age