IONA PROPHETA 3

₁et factum est verbum Domini ad Ionam secundo dicens

₂surge vade ad Nineven civitatem magnam

et praedica in ea praedicationem quam ego loquor ad te

₃et surrexit Iona et abiit in Nineven iuxta verbum Domini

et Nineve erat civitas magna Dei

itinere dierum trium

₄et coepit Iona introire in civitatem itinere diei unius

et clamavit et dixit

adhuc quadraginta dies et Nineve subvertetur

₅et crediderunt viri ninevitae in Deo

et praedicaverunt ieiunium

et vestiti sunt saccis a maiore usque ad minorem

₆et pervenit verbum ad regem Nineve

et surrexit de solio suo

et abiecit vestimentum suum a se

et indutus est sacco et sedit in cinere

₇et clamavit et dixit in Nineve ex ore regis et principum eius dicens

homines et iumenta et boves et pecora non gustent quicquam

nec pascantur et aquam non bibant

₈et operiantur saccis homines et iumenta

et clament ad Dominum in fortitudine

et convertatur vir a via sua mala

et ab iniquitate quae est in manibus eorum

₉quis scit si convertatur et ignoscat Deus

et revertatur a furore irae suae et non peribimus

₁₀et vidit Deus opera eorum

quia conversi sunt a via sua mala

et misertus est Deus super malitiam

quam locutus fuerat ut faceret eis et non fecit