IONA PROPHETA 2

₁et praeparavit Dominus piscem grandem ut degluttiret Ionam

et erat Iona in ventre piscis

tribus diebus et tribus noctibus

₂et oravit Iona ad Dominum Deum suum de utero piscis

₃et dixit clamavi de tribulatione mea ad Dominum et exaudivit me

de ventre inferni clamavi et exaudisti vocem meam

₄et proiecisti me in profundum in corde maris

et flumen circumdedit me

omnes gurgites tui et fluctus tui super me transierunt

₅et ego dixi abiectus sum a conspectu oculorum tuorum

verumtamen rursus videbo templum sanctum tuum

₆circumdederunt me aquae usque ad animam abyssus vallavit me

pelagus operuit caput meum

₇ad extrema montium descendi

terrae vectes concluserunt me in aeternum

et sublevabis de corruptione vitam meam Domine Deus meus

₈cum angustiaretur in me anima mea Domini recordatus sum

ut veniat ad te oratio mea ad templum sanctum tuum

₉qui custodiunt vanitates frustra

misericordiam suam derelinquunt

₁₀ego autem in voce laudis immolabo tibi

quaecumque vovi reddam pro salute Domino

₁₁et dixit Dominus pisci et evomuit Ionam in aridam