LIBER IOB 6

₁respondens autem Iob dixit

₂utinam adpenderentur peccata mea quibus iram merui

et calamitas quam patior in statera

₃quasi harena maris haec gravior appareret

unde et verba mea dolore sunt plena

₄quia sagittae Domini in me sunt

quarum indignatio ebibit spiritum meum

et terrores Domini militant contra me

₅numquid rugiet onager cum habuerit herbam

aut mugiet bos cum ante praesepe plenum steterit

₆aut poterit comedi insulsum quod non est sale conditum

aut potest aliquis gustare quod gustatum adfert mortem

₇quae prius tangere nolebat anima mea

nunc prae angustia cibi mei sunt

₈quis det ut veniat petitio mea

et quod expecto tribuat mihi Deus

₉et qui coepit ipse me conterat

solvat manum suam et succidat me

₁₀et haec mihi sit consolatio ut adfligens me dolore non parcat

nec contradicam sermonibus Sancti

₁₁quae est enim fortitudo mea ut sustineam

aut quis finis meus ut patienter agam

₁₂nec fortitudo lapidum fortitudo mea

nec caro mea aerea est

₁₃ecce non est auxilium mihi in me

et necessarii quoque mei recesserunt a me

₁₄qui tollit ab amico suo misericordiam

timorem Domini derelinquit

₁₅fratres mei praeterierunt me

sicut torrens qui raptim transit in convallibus

₁₆qui timent pruinam inruet super eos nix

₁₇tempore quo fuerint dissipati peribunt

et ut incaluerit solventur de loco suo

₁₈involutae sunt semitae gressuum eorum

ambulabunt in vacuum et peribunt

₁₉considerate semitas Theman itinera Saba et expectate

paulisper

₂₀confusi sunt quia speravi

venerunt quoque usque ad me et pudore cooperti sunt

₂₁nunc venistis et modo videntes plagam meam timetis

₂₂numquid dixi adferte mihi

et de substantia vestra donate mihi

₂₃vel liberate me de manu hostis et de manu robustorum eruite me

₂₄docete me et ego tacebo et si quid forte ignoravi instruite me

₂₅quare detraxistis sermonibus veritatis

cum e vobis nullus sit qui possit arguere

₂₆ad increpandum tantum eloquia concinnatis

et in ventum verba profertis

₂₇super pupillum inruitis

et subvertere nitimini amicum vestrum

₂₈verumtamen quod coepistis explete

praebete aurem et videte an mentiar

₂₉respondete obsecro absque contentione

et loquentes id quod iustum est iudicate

₃₀et non invenietis in lingua mea iniquitatem

nec in faucibus meis stultitia personabit