LIBER IOB 33

₁audi igitur Iob eloquia mea et omnes sermones meos ausculta

₂ecce aperui os meum loquatur lingua mea in faucibus meis

₃simplici corde meo sermones mei

et sententiam labia mea puram loquentur

₄spiritus Dei fecit me et spiraculum Omnipotentis vivificavit me

₅si potes responde mihi et adversus faciem meam consiste

₆ecce et me sicut et te fecit Deus

et de eodem luto ego quoque formatus sum

₇verumtamen miraculum meum non te terreat

et eloquentia mea non sit tibi gravis

₈dixisti ergo in auribus meis et vocem verborum

audivi

₉mundus sum ego absque delicto

inmaculatus et non est iniquitas in me

₁₀quia querellas in me repperit

ideo arbitratus est me inimicum sibi

₁₁posuit in nervo pedes meos custodivit omnes semitas meas

₁₂hoc est ergo in quo non es iustificatus

respondebo tibi quia maior sit Deus homine

₁₃adversum eum contendis

quod non ad omnia verba responderit tibi

₁₄semel loquitur Deus

et secundo id ipsum non repetit

₁₅per somnium in visione nocturna

quando inruit sopor super homines et dormiunt in lectulo

₁₆tunc aperit aures virorum

et erudiens eos instruit disciplinam

₁₇ut avertat hominem ab his quae facit et liberet eum de superbia

₁₈eruens animam eius a corruptione

et vitam illius ut non transeat in gladium

₁₉increpat quoque per dolorem in lectulo

et omnia ossa eius marcescere facit

₂₀abominabilis ei fit in vita sua panis

et animae illius cibus ante desiderabilis

₂₁tabescet caro eius et ossa quae tecta fuerant nudabuntur

₂₂adpropinquabit corruptioni anima eius

et vita illius mortiferis

₂₃si fuerit pro eo angelus loquens unum de milibus

ut adnuntiet hominis aequitatem

₂₄miserebitur eius et dicet

libera eum et non descendat in corruptionem

inveni in quo ei propitier

₂₅consumpta est caro eius a suppliciis

revertatur ad dies adulescentiae suae

₂₆deprecabitur Deum et placabilis ei erit

et videbit faciem eius in iubilo et reddet homini iustitiam suam

₂₇respiciet homines et dicet peccavi et vere deliqui

et ut eram dignus non recepi

₂₈liberavit animam suam ne pergeret in interitum

sed vivens lucem videret

₂₉ecce haec omnia operatur Deus tribus vicibus per singulos

₃₀ut revocet animas eorum a corruptione

et inluminet luce viventium

₃₁adtende Iob et audi me et tace dum ego loquar

₃₂si autem habes quod loquaris responde mihi loquere

volo enim te apparere iustum

₃₃quod si non habes audi me tace et docebo te sapientiam