LIBER IOB 31

₁pepigi foedus cum oculis meis ut ne cogitarem quidem de virgine

₂quam enim partem haberet Deus in me desuper

et hereditatem Omnipotens de excelsis

₃numquid non perditio est iniquo

et alienatio operantibus iniustitiam

₄nonne ipse considerat vias meas

et cunctos gressus meos dinumerat

₅si ambulavi in vanitate et festinavit in dolo pes meus

₆adpendat me in statera iusta et sciat Deus simplicitatem meam

₇si declinavit gressus meus de via

et si secutum est oculos meos cor meum

et in manibus meis adhesit macula

₈seram et alius comedat et progenies mea eradicetur

₉si deceptum est cor meum super mulierem

et si ad ostium amici mei insidiatus sum

₁₀scortum sit alteri uxor mea

et super illam incurventur alii

₁₁hoc enim nefas est et iniquitas maxima

₁₂ignis est usque ad perditionem devorans

et omnia eradicans genimina

₁₃si contempsi subire iudicium cum servo meo

et ancillae meae cum disceptarent adversum me

₁₄quid enim faciam cum surrexerit ad iudicandum Deus

et cum quaesierit quid respondebo illi

₁₅numquid non in utero fecit me qui et illum operatus est

et formavit in vulva unus

₁₆si negavi quod volebant pauperibus et oculos viduae expectare feci

₁₇si comedi buccellam meam solus et non comedit pupillus ex ea

₁₈quia ab infantia mea crevit mecum miseratio

et de utero matris meae egressa est mecum

₁₉si despexi pereuntem eo quod non habuerit indumentum

et absque operimento pauperem

₂₀si non benedixerunt mihi latera eius

et de velleribus ovium mearum calefactus est

₂₁si levavi super pupillum manum meam

etiam cum viderem me in porta superiorem

₂₂umerus meus a iunctura sua cadat

et brachium meum cum suis ossibus confringatur

₂₃semper enim quasi tumentes super me fluctus timui Deum

et pondus eius ferre non potui

₂₄si putavi aurum robur meum

et obrizae dixi fiducia mea

₂₅si laetatus sum super multis divitiis meis

et quia plurima repperit manus mea

₂₆si vidi solem cum fulgeret et lunam incedentem clare

₂₇et lactatum est in abscondito cor meum

et osculatus sum manum meam ore meo

₂₈quae est iniquitas maxima et negatio contra Deum altissimum

₂₉si gavisus sum ad ruinam eius qui me oderat

et exultavi quod invenisset eum malum

₃₀non enim dedi ad peccandum guttur meum

ut expeterem maledicens animam eius

₃₁si non dixerunt viri tabernaculi mei

quis det de carnibus eius ut saturemur

₃₂foris non mansit peregrinus ostium meum viatori patuit

₃₃si abscondi quasi homo peccatum meum

et celavi in sinu meo iniquitatem meam

₃₄si expavi ad multitudinem nimiam

et despectio propinquorum terruit me

et non magis tacui nec egressus sum ostium

₃₅quis mihi tribuat auditorem

ut desiderium meum Omnipotens audiat

et librum scribat ipse qui iudicat

₃₆ut in umero meo portem illum

et circumdem illum quasi coronam mihi

₃₇per singulos gradus meos pronuntiabo illum

et quasi principi offeram eum

₃₈si adversum me terra mea clamat et cum ipsa sulci eius deflent

₃₉si fructus eius comedi absque pecunia

et animam agricolarum eius adflixi

₄₀pro frumento oriatur mihi tribulus et pro hordeo spina

finita sunt verba Iob