LIBER IOB 30

₁nunc autem derident me iuniores tempore

quorum non dignabar patres ponere cum canibus gregis mei

₂quorum virtus manuum erat mihi pro nihilo

et vita ipsa putabantur indigni

₃egestate et fame steriles

qui rodebant in solitudine squalentes calamitate et miseria

₄et mandebant herbas et arborum cortices

et radix iuniperorum erat cibus eorum

₅qui de convallibus ista rapientes

cum singula repperissent ad ea cum clamore currebant

₆in desertis habitabant torrentium

et in cavernis terrae vel super glaream

₇qui inter huiuscemodi laetabantur

et esse sub sentibus delicias conputabant

₈filii stultorum et ignobilium et in terra penitus non parentes

₉nunc in eorum canticum versus sum

et factus sum eis proverbium

₁₀abominantur me et longe fugiunt a me

et faciem meam conspuere non verentur

₁₁faretram enim suam aperuit et adflixit me

et frenum posuit in os meum

₁₂ad dexteram orientis calamitatis meae ilico

surrexerunt

pedes meos subverterunt

et oppresserunt quasi fluctibus semitis suis

₁₃dissipaverunt itinera mea insidiati sunt mihi et praevaluerunt

et non fuit qui ferret auxilium

₁₄quasi rupto muro et aperta ianua inruerunt super me

et ad meas miserias devoluti sunt

₁₅redactus sum in nihili

abstulisti quasi ventus desiderium meum

et velut nubes pertransiit salus mea

₁₆nunc autem in memet ipso marcescit anima mea

et possident me dies adflictionis

₁₇nocte os meum perforatur doloribus

et qui me comedunt non dormiunt

₁₈in multitudine eorum consumitur vestimentum meum

et quasi capitio tunicae sic cinxerunt me

₁₉conparatus sum luto et adsimilatus favillae et cineri

₂₀clamo ad te et non exaudis me

sto et non respicis me

₂₁mutatus es mihi in crudelem

et in duritia manus tuae adversaris mihi

₂₂elevasti me et quasi super ventum ponens elisisti me valide

₂₃scio quia morti tradas me

ubi constituta domus est omni viventi

₂₄verumtamen non ad consumptionem

eorum emittis manum tuam

et si corruerint ipse salvabis

₂₅flebam quondam super eum qui adflictus erat

et conpatiebatur anima mea pauperi

₂₆expectabam bona et venerunt mihi mala

praestolabar lucem et eruperunt tenebrae

₂₇interiora mea efferbuerunt absque ulla requie

praevenerunt me dies adflictionis

₂₈maerens incedebam sine furore

consurgens in turba clamavi

₂₉frater fui draconum et socius strutionum

₃₀cutis mea denigrata est super me

et ossa mea aruerunt prae caumate

₃₁versa est in luctum cithara mea

et organum meum in vocem flentium