LIBER IOB 26

₁respondens autem Iob dixit

₂cuius adiutor es numquid inbecilli

et sustentas brachium eius qui non est fortis

₃cui dedisti consilium forsitan illi qui non habet sapientiam

et prudentiam tuam ostendisti plurimam

₄quem docere voluisti

nonne eum qui fecit spiramen tuum

₅ecce gigantes gemunt sub aquis et qui habitant cum eis

₆nudus est inferus coram illo

et nullum est operimentum perditioni

₇qui extendit aquilonem super vacuum

et adpendit terram super nihili

₈qui ligat aquas in nubibus suis ut non erumpant pariter deorsum

₉qui tenet vultum solii sui

et expandit super illud nebulam suam

₁₀terminum circumdedit aquis

usque dum finiantur lux et tenebrae

₁₁columnae caeli contremescunt et pavent ad nutum eius

₁₂in fortitudine illius repente maria congregata sunt

et prudentia eius percussit superbum

₁₃spiritus eius ornavit caelos

et obsetricante manu eius eductus est coluber tortuosus

₁₄ecce haec ex parte dicta sunt viarum eius

et cum vix parvam stillam sermonis eius audierimus

quis poterit tonitruum magnitudinis illius intueri