LIBER IOB 21

₁respondens autem Iob dixit

₂audite quaeso sermones meos

et agetis paenitentiam

₃sustinete me ut et ego loquar

et post mea si videbitur verba ridete

₄numquid contra hominem disputatio mea est

ut merito non debeam contristari

₅adtendite me et obstupescite et superponite digitum ori vestro

₆et ego quando recordatus fuero pertimesco

et concutit carnem meam tremor

₇quare ergo impii vivunt sublevati sunt confortatique divitiis

₈semen eorum permanet coram eis

propinquorum turba et nepotum in conspectu eorum

₉domus eorum securae sunt et pacatae

et non est virga Dei super illos

₁₀bos eorum concepit et non abortit

vacca peperit et non est privata fetu suo

₁₁egrediuntur quasi greges parvuli eorum

et infantes eorum exultant lusibus

₁₂tenent tympanum et citharam

et gaudent ad sonitum organi

₁₃ducunt in bonis dies suos et in puncto ad inferna descendunt

₁₄qui dixerunt Deo recede a nobis

et scientiam viarum tuarum nolumus

₁₅quid est Omnipotens ut serviamus ei

et quid nobis prodest si oraverimus illum

₁₆verumtamen quia non sunt in manu eorum bona sua

consilium impiorum longe sit a me

₁₇quotiens lucerna impiorum extinguetur

et superveniet eis inundatio et dolores dividet furoris sui

₁₈erunt sicut paleae ante faciem venti

et sicut favilla quam turbo dispergit

₁₉Deus servabit filiis illius dolorem patris

et cum reddiderit tunc sciet

₂₀videbunt oculi eius interfectionem suam

et de furore Omnipotentis bibet

₂₁quid enim ad eum pertinet de domo sua post se

et si numerus mensuum eius dimidietur

₂₂numquid Deum quispiam docebit scientiam

qui excelsos iudicat

₂₃iste moritur robustus et sanus dives et felix

₂₄viscera eius plena sunt adipe et medullis ossa illius inrigantur

₂₅alius vero moritur in amaritudine animae absque ullis

opibus

₂₆et tamen simul in pulverem dormient

et vermes operient eos

₂₇certe novi cogitationes vestras et sententias contra me iniquas

₂₈dicitis enim ubi est domus principis et ubi tabernacula impiorum

₂₉interrogate quemlibet de viatoribus

et haec eadem eum intellegere cognoscetis

₃₀quia in diem perditionis servabitur malus

et ad diem furoris ducitur

₃₁quis arguet coram eo viam eius

et quae fecit quis reddet illi

₃₂ipse ad sepulchra ducetur

et in congerie mortuorum vigilabit

₃₃dulcis fuit glareis Cocyti

et post se omnem hominem trahet et ante se innumerabiles

₃₄quomodo igitur consolamini me frustra

cum responsio vestra repugnare ostensa sit veritati