LIBER IOB 20

₁respondens autem Sophar Naamathites dixit

₂idcirco cogitationes meae variae succedunt sibi

et mens in diversa rapitur

₃doctrinam qua me arguis audiam

et spiritus intellegentiae meae respondebit mihi

₄hoc scio a principio ex quo positus est homo super terram

₅quod laus impiorum brevis sit

et gaudium hypocritae ad instar puncti

₆si ascenderit usque ad caelum superbia eius

et caput eius nubes tetigerit

₇quasi sterquilinium in fine perdetur

et qui eum viderant dicent ubi est

₈velut somnium avolans non invenietur

transiet sicut visio nocturna

₉oculus qui eum viderat non videbit

neque ultra intuebitur eum locus suus

₁₀filii eius adterentur egestate

et manus illius reddent ei dolorem suum

₁₁ossa eius implebuntur vitiis adulescentiae eius

et cum eo in pulverem dormient

₁₂cum enim dulce fuerit in ore eius malum

abscondet illud sub lingua sua

₁₃parcet illi et non derelinquet illud

et celabit in gutture suo

₁₄panis eius in utero illius vertetur in fel aspidum

intrinsecus

₁₅divitias quas devoravit evomet et de ventre illius extrahet eas Deus

₁₆caput aspidum suget

occidet eum lingua viperae

₁₇non videat rivulos fluminis torrentes mellis et butyri

₁₈luet quae fecit omnia nec tamen consumetur

iuxta multitudinem adinventionum suarum sic et sustinebit

₁₉quoniam confringens nudavit pauperes

domum rapuit et non aedificavit eam

₂₀nec est satiatus venter eius

et cum habuerit quae cupierat possidere non poterit

₂₁non remansit de cibo eius

et propterea nihil permanebit de bonis eius

₂₂cum satiatus fuerit artabitur

aestuabit et omnis dolor inruet in eum

₂₃utinam impleatur venter eius ut emittat in eum iram furoris sui

et pluat super illum bellum suum

₂₄fugiet arma ferrea et inruet in arcum aereum

₂₅eductus et egrediens de vagina sua et fulgurans in amaritudine sua

vadent et venient super eum horribiles

₂₆omnes tenebrae absconditae sunt in occultis eius

devorabit eum ignis qui non succenditur

adfligetur relictus in tabernaculo suo

₂₇revelabunt caeli iniquitatem eius et terra consurget adversus eum

₂₈apertum erit germen domus illius detrahetur in die furoris Dei

₂₉haec est pars hominis impii a Deo

et hereditas verborum eius a Domino