LIBER IOB 22

₁respondens autem Eliphaz Themanites dixit

₂numquid Deo conparari potest homo

etiam cum perfectae fuerit scientiae

₃quid prodest Deo si iustus fueris

aut quid ei confers si inmaculata fuerit via tua

₄numquid timens arguet te

et veniet tecum in iudicium

₅et non propter malitiam tuam plurimam et infinitas iniquitates tuas

₆abstulisti enim pignus fratrum tuorum sine causa

et nudos spoliasti vestibus

₇aquam lasso non dedisti et esurienti subtraxisti panem

₈in fortitudine brachii tui possidebas terram

et potentissimus obtinebas eam

₉viduas dimisisti vacuas et lacertos pupillorum comminuisti

₁₀propterea circumdatus es laqueis et conturbat te formido subita

₁₁et putabas te tenebras non visurum

et impetu aquarum inundantium non oppressurum

₁₂an cogitas quod Deus excelsior caelo

et super stellarum vertices sublimetur

₁₃et dicis quid enim novit Deus

et quasi per caliginem iudicat

₁₄nubes latibulum eius nec nostra considerat

et circa cardines caeli perambulat

₁₅numquid semitam saeculorum custodire cupis

quam calcaverunt viri iniqui

₁₆qui sublati sunt ante tempus suum

et fluvius subvertit fundamentum eorum

₁₇qui dicebant Deo recede a nobis

et quasi nihil possit facere Omnipotens aestimabant

eum

₁₈cum ille implesset domos eorum bonis

quorum sententia procul sit a me

₁₉videbunt iusti et laetabuntur et innocens subsannabit eos

₂₀nonne succisa est erectio eorum et reliquias eorum devoravit ignis

₂₁adquiesce igitur ei et habeto pacem

et per haec habebis fructus optimos

₂₂suscipe ex ore illius legem et pone sermones eius in corde tuo

₂₃si reversus fueris ad Omnipotentem aedificaberis

et longe facies iniquitatem a tabernaculo tuo

₂₄dabit pro terra silicem et pro silice torrentes aureos

₂₅eritque Omnipotens contra hostes tuos

et argentum coacervabitur tibi

₂₆tunc super Omnipotentem deliciis afflues

et elevabis ad Deum faciem tuam

₂₇rogabis eum et exaudiet te et vota tua reddes

₂₈decernes rem et veniet tibi

et in viis tuis splendebit lumen

₂₉qui enim humiliatus fuerit erit in gloria et qui inclinaverit oculos suos ipse salvabitur

₃₀salvabitur innocens salvabitur autem munditia manuum suarum