LIBER IOB 19

₁respondens autem Iob dixit

₂usquequo adfligitis animam meam et adteritis me sermonibus

₃en decies confunditis me

et non erubescitis opprimentes me

₄nempe et si ignoravi mecum erit ignorantia mea

₅at vos contra me erigimini

et arguitis me obprobriis meis

₆saltim nunc intellegite quia Deus non aequo iudicio adflixerit me

et flagellis suis me cinxerit

₇ecce clamabo vim patiens et nemo audiet

vociferabor et non est qui iudicet

₈semitam meam circumsepsit et transire non possum

et in calle meo tenebras posuit

₉spoliavit me gloria mea

et abstulit coronam de capite meo

₁₀destruxit me undique et pereo

et quasi evulsae arbori abstulit spem meam

₁₁iratus est contra me furor eius et sic me habuit quasi hostem suum

₁₂simul venerunt latrones eius et fecerunt sibi viam per me

et obsederunt in gyro tabernaculum meum

₁₃fratres meos longe fecit a me

et noti mei quasi alieni recesserunt a me

₁₄dereliquerunt me propinqui mei

et qui me noverant obliti sunt mei

₁₅inquilini domus meae et ancillae meae sicut alienum habuerunt me

et quasi peregrinus fui in oculis eorum

₁₆servum meum vocavi et non respondit

ore proprio deprecabar illum

₁₇halitum meum exhorruit uxor mea et orabam filios uteri mei

₁₈stulti quoque despiciebant me

et cum ab eis recessissem detrahebant mihi

₁₉abominati sunt me quondam consiliarii mei

et quem maxime diligebam aversatus est me

₂₀pelli meae consumptis carnibus adhesit os meum

et derelicta sunt tantummodo labia circa dentes meos

₂₁miseremini mei miseremini mei saltim vos amici mei

quia manus Domini tetigit me

₂₂quare persequimini me sicut Deus et carnibus meis saturamini

₂₃quis mihi tribuat ut scribantur sermones mei

quis mihi det ut exarentur in libro

₂₄stilo ferreo et plumbi lammina

vel certe sculpantur in silice

₂₅scio enim quod redemptor meus vivat

et in novissimo de terra surrecturus sim

₂₆et rursum circumdabor pelle mea

et in carne mea videbo Deum

₂₇quem visurus sum ego ipse

et oculi mei conspecturi sunt et non alius

reposita est haec spes mea in sinu meo

₂₈quare ergo nunc dicitis persequamur eum et radicem verbi inveniamus contra eum

₂₉fugite ergo a facie gladii quoniam ultor iniquitatum gladius est et scitote esse iudicium