HIEREMIAS PROPHETA 45

₁verbum quod locutus est Hieremias propheta ad Baruch filium Neri

cum scripsisset verba haec in libro de ore Hieremiae

anno quarto Ioachim filii Iosiae regis Iuda dicens

₂haec dicit Dominus Deus Israhel ad te Baruch

₃dixisti vae misero mihi

quoniam addidit Dominus dolorem dolori meo

laboravi in gemitu meo et requiem non inveni

₄haec dices ad eum sic dicit Dominus

ecce quos aedificavi ego destruo

et quos plantavi ego evello et universam terram hanc

₅et tu quaeris tibi grandia noli quaerere

quia ecce ego adducam malum super omnem carnem ait Dominus

et dabo tibi animam tuam in salutem

in omnibus locis ad quaecumque perrexeris