HIEREMIAS PROPHETA 46

₁quod factum est verbum Domini ad Hieremiam prophetam contra gentes

₂ad Aegyptum

adversum exercitum Pharaonis Nechao regis Aegypti

qui erat iuxta flumen Eufraten in Charchamis

quem percussit Nabuchodonosor rex Babylonis

in quarto anno Ioachim filii Iosiae regis Iuda

₃praeparate scutum et clypeum et procedite ad bellum

₄iungite equos et ascendite equites

state in galeis polite lanceas induite vos loricis

₅quid igitur vidi

ipsos pavidos et terga vertentes fortes eorum caesos

fugerunt conciti nec respexerunt terror undique ait Dominus

₆non fugiat velox nec salvari se putet fortis

ad aquilonem iuxta flumen Eufraten victi sunt et ruerunt

₇quis est iste qui quasi flumen ascendit

et veluti fluviorum intumescunt gurgites eius

₈Aegyptus fluminis instar ascendet

et velut flumina movebuntur fluctus eius

et dicet ascendens operiam terram

perdam civitatem et habitatores eius

₉ascendite equos et exultate in curribus et procedant fortes

Aethiopia et Lybies tenentes scutum

et Lydii arripientes et iacientes sagittas

₁₀dies autem ille Domini Dei exercituum dies ultionis

ut sumat vindictam de inimicis suis

devorabit gladius et saturabitur

et inebriabitur sanguine eorum

victima enim Domini exercituum

in terra aquilonis iuxta flumen Eufraten

₁₁ascende in Galaad et tolle resinam virgo filia Aegypti

frustra multiplicas medicamina sanitas non erit tibi

₁₂audierunt gentes ignominiam tuam

et ululatus tuus replevit terram

quia fortis inpegit in fortem ambo pariter conciderunt

₁₃verbum quod locutus est Dominus ad Hieremiam prophetam

super eo quod venturus esset Nabuchodonosor rex Babylonis

et percussurus terram Aegypti

₁₄adnuntiate Aegypto et auditum facite Magdolo

et resonet in Memphis et in Tafnis dicite

sta et praepara te

quia devoravit gladius ea quae per circuitum tuum

sunt

₁₅quare conputruit fortis tuus

non stetit quoniam Dominus subvertit eum

₁₆multiplicavit ruentes ceciditque vir ad proximum suum

et dicent surge et revertamur ad populum nostrum

et ad terram nativitatis nostrae a facie gladii columbae

₁₇vocate nomen Pharao regis Aegypti

Tumultum adduxit tempus

₁₈vivo ego inquit Rex Dominus exercituum nomen eius

quoniam sicut Thabor in montibus

et sicut Carmelus in mari veniet

₁₉vasa transmigrationis fac tibi habitatrix filia Aegypti

quia Memphis in solitudinem erit

et deseretur inhabitabilis

₂₀vitula eligans atque formonsa Aegyptus

stimulator ab aquilone veniet ei

₂₁mercennarii quoque eius qui versabantur in medio eius

quasi vituli saginati

versi sunt et fugerunt simul nec stare potuerunt

quia dies interfectionis eorum venit super eos

tempus visitationis eorum

₂₂vox eius quasi aeris sonabit quoniam cum exercitu properabunt

et cum securibus venient ei quasi ligna caedentes

₂₃succiderunt saltum eius ait Dominus qui supputari non potest

multiplicati sunt super lucustas et non est eis numerus

₂₄confusa est filia Aegypti et tradita in manu populi aquilonis

₂₅dixit Dominus exercituum Deus Israhel

ecce ego visitabo super tumultum Alexandriae

et super Pharao et super Aegyptum

et super deos eius et super reges eius

et super Pharao et super eos qui confidunt in eo

₂₆et dabo eos in manu quaerentium animam eorum

et in manu Nabuchodonosor regis Babylonis

et in manu servorum eius

et post haec habitabitur sicut diebus pristinis ait Dominus

₂₇et tu ne timeas serve meus Iacob et ne paveas Israhel

quia ecce ego salvum te faciam de longinquo

et semen tuum de terra captivitatis suae

et revertetur Iacob et quiescet

et prosperabitur et non erit qui exterreat eum

₂₈et tu noli timere serve meus Iacob ait Dominus

quia tecum ego sum

quia consumam ego cunctas gentes ad quas eieci te

te vero non consumam sed castigabo te in iudicio

nec quasi innocenti parcam tibi