HIEREMIAS PROPHETA 44

₁verbum quod factum est ad Hieremiam

ad omnes Iudaeos qui habitant in terra Aegypti

habitantes in Magdolo et in Tafnis

et in Memphis et in terra Fatures dicens

₂haec dicit Dominus exercituum Deus Israhel

vos vidistis omne malum istud

quod adduxi super Hierusalem et super omnes urbes Iuda

et ecce sunt desertae hodie et non est in eis habitator

₃propter malitiam quam fecerunt ut me ad iracundiam provocarent

et irent et sacrificarent et colerent deos alienos

quos nesciebant et illi et vos et patres vestri

₄et misi ad vos omnes servos meos prophetas

de nocte consurgens mittensque et dicens

nolite facere verbum abominationis huius quam odi

₅et non audierunt nec inclinaverunt aurem suam

ut converterentur a malis suis et non sacrificarent diis alienis

₆et conflata est indignatio mea et furor meus

et succensa est in civitatibus Iuda et in plateis Hierusalem

et versae sunt in solitudinem et vastitatem secundum diem hanc

₇et nunc haec dicit Dominus exercituum Deus Israhel

quare vos facitis malum grande contra animas vestras

ut intereat ex vobis vir et mulier

parvulus et lactans de medio Iudae

nec relinquatur vobis quicquam residuum

₈provocantes me in operibus manuum vestrarum

sacrificando diis alienis in terra Aegypti

in quam ingressi estis ut habitetis ibi

et dispereatis et sitis in maledictionem

et in obprobrium cunctis gentibus terrae

₉numquid obliti estis mala patrum vestrorum

et mala regum Iuda et mala uxorum eius

et mala vestra et mala uxorum vestrarum

quae fecerunt in terra Iuda et in regionibus Hierusalem

₁₀non sunt mundati usque ad diem hanc et non timuerunt

et non ambulaverunt in lege et in praeceptis meis

quae dedi coram vobis et coram patribus vestris

₁₁ideo haec dicit Dominus exercituum Deus Israhel

ecce ego pono faciem meam in vobis in malum

et disperdam omnem Iudam

₁₂et adsumam reliquias Iudae qui posuerunt facies suas

ut ingrederentur terram Aegypti et habitarent ibi

et consumentur omnes in terra Aegypti cadent

in gladio et in fame consumentur

a minimo usque ad maximum in gladio et in fame morientur

et erunt in iusiurandum et in miraculum

et in maledictionem et in obprobrium

₁₃et visitabo habitatores terrae Aegypti

sicut visitavi super Hierusalem

in gladio et in fame et in peste

₁₄et non erit qui effugiat et sit residuus de reliquiis

Iudaeorum

qui vadunt ut peregrinentur in terra Aegypti

et revertantur in terram Iuda

ad quam ipsi elevant animas suas ut revertantur et habitent ibi

non revertentur nisi qui fugerint

₁₅responderunt autem Hieremiae omnes viri

scientes quod sacrificarent uxores eorum diis alienis

et universae mulieres quarum stabat multitudo grandis

et omnis populus habitantium in terra Aegypti in Fatures dicens

₁₆sermonem quem locutus es ad nos in nomine Domini

non audiemus ex te

₁₇sed facientes faciemus omne verbum

quod egreditur de ore nostro

ut sacrificemus Reginae caeli et libemus ei libamina

sicut fecimus nos et patres nostri reges nostri et principes nostri

in urbibus Iuda et in plateis Hierusalem

et saturati sumus panibus

et bene nobis erat malumque non vidimus

₁₈ex eo autem quo cessavimus sacrificare

Reginae caeli

et libare ei libamina

indigemus omnibus et gladio et fame consumpti sumus

₁₉quod si nos sacrificamus Reginae caeli et libamus ei libamina

numquid sine viris nostris fecimus ei placentas

ad colendum eam et liba libandi

₂₀et dixit Hieremias ad omnem populum

adversum viros et adversum mulieres et adversum universam plebem

qui responderant ei verbum dicens

₂₁numquid non sacrificium quod sacrificastis in civitatibus

Iuda et in plateis Hierusalem

vos et patres vestri reges vestri et principes vestri et populus terrae

horum recordatus est Dominus et ascendit super cor eius

₂₂et non poterat Dominus ultra portare

propter malitiam studiorum vestrorum

et propter abominationes quas fecistis

et facta est terra vestra in desolationem

et in stuporem et in maledictum

eo quod non sit habitator sicut est dies haec

₂₃propterea quod sacrificaveritis idolis et peccaveritis

Domino

et non audieritis vocem Domini

et in lege et in praeceptis et in testimoniis eius non ambulaveritis

idcirco evenerunt vobis mala haec

sicut est dies haec

₂₄dixit autem Hieremias ad omnem populum et ad universas mulieres

audite verbum Domini omnis Iuda qui estis in terra Aegypti

₂₅haec inquit Dominus exercituum Deus Israhel dicens

vos et uxores vestrae locuti estis ore vestro

et manibus vestris implestis dicentes

faciamus vota nostra quae vovimus

ut sacrificemus Reginae caeli et libemus ei libamina

implestis vota vestra et opere perpetrastis ea

₂₆ideo audite verbum Domini

omnis Iuda qui habitatis in terra Aegypti

ecce ego iuravi in nomine meo magno ait Dominus

quia nequaquam ultra nomen meum vocabitur

ex ore omnis viri iudaei dicentis

vivit Dominus Deus in omni terra Aegypti

₂₇ecce ego vigilabo super eos in malum et non in bonum

et consumentur omnes viri Iuda qui sunt in terra Aegypti

gladio et fame donec penitus consumantur

₂₈et qui fugerint gladium

revertentur de terra Aegypti in terram Iuda viri pauci

et scient omnes reliquiae Iuda

ingredientium terram Aegypti ut habitent ibi

cuius sermo conpleatur meus an illorum

₂₉et hoc vobis signum ait Dominus

quod visitem ego super vos in loco isto

ut sciatis quia vere conplebuntur sermones mei contra vos in malum

₃₀haec dicit Dominus

ecce ego tradam Pharaonem Efree regem Aegypti in manu inimicorum eius

et in manu quaerentium animam illius

sicut tradidi Sedeciam regem Iuda

in manu Nabuchodonosor regis Babylonis

inimici sui et quaerentis animam eius