HIEREMIAS PROPHETA 29

₁et haec sunt verba libri

quae misit Hieremias propheta de Hierusalem

ad reliquias seniorum transmigrationis

et ad sacerdotes et ad prophetas et ad omnem populum

quem transduxerat Nabuchodonosor de Hierusalem in Babylonem

₂postquam egressus est Iechonias rex et domina

et eunuchi et principes Iuda et Hierusalem

et faber et inclusor de Hierusalem

₃in manu Ellasa filii Saphan et Gamaliae filii Helciae

quos misit Sedecias rex Iuda ad Nabuchodonosor regem Babylonis in

Babylonem dicens

₄haec dicit Dominus exercituum Deus Israhel

omni transmigrationi quam transtuli de Hierusalem in

Babylonem

₅aedificate domos et habitate

et plantate hortos et comedite fructum eorum

₆accipite uxores et generate filios et filias

date filiis vestris uxores et filias vestras date viris

et pariant filios et filias

et multiplicamini ibi et nolite esse pauci numero

₇et quaerite pacem civitatis ad quam transmigrare vos feci

et orate pro ea ad Dominum quia in pace illius erit pax vobis

₈haec enim dicit Dominus exercituum Deus Israhel

non vos inducant prophetae vestri

qui sunt in medio vestrum et divini vestri

et ne adtendatis ad somnia vestra quae vos somniatis

₉quia falso ipsi prophetant vobis in nomine meo

et non misi eos dicit Dominus

₁₀quia haec dicit Dominus

cum coeperint impleri in Babylone septuaginta anni

visitabo vos et suscitabo super vos verbum meum bonum

ut reducam vos ad locum istum

₁₁ego enim scio cogitationes quas cogito super vos ait Dominus

cogitationes pacis et non adflictionis

ut dem vobis finem et patientiam

₁₂et invocabitis me et ibitis

et orabitis me et exaudiam vos

₁₃quaeretis me et invenietis

cum quaesieritis me in toto corde vestro

₁₄et inveniar a vobis ait Dominus

et reducam captivitatem vestram

et congregabo vos de universis gentibus

et de cunctis locis ad quae expuli vos dicit Dominus

et reverti vos faciam de loco ad quem transmigrare

vos feci

₁₅quia dixistis suscitavit nobis Dominus prophetas in

Babylone

₁₆quia haec dicit Dominus ad regem qui sedet super solium David

et ad omnem populum habitatorem urbis huius

ad fratres vestros qui non sunt egressi vobiscum in transmigrationem

₁₇haec dicit Dominus exercituum

ecce mittam in eis gladium et famem et pestem

et ponam eos quasi ficus malas

quae comedi non possunt eo quod pessimae sint

₁₈et persequar eos in gladio in fame et in

pestilentia

et dabo eos in vexationem universis regnis terrae

in maledictionem et in stuporem

et in sibilum et in obprobrium cunctis gentibus

ad quas ego eieci eos

₁₉eo quod non audierint verba mea dicit Dominus

quae misi ad eos per servos meos prophetas

de nocte consurgens et mittens et non audistis dicit Dominus

₂₀vos ergo audite verbum Domini

omnis transmigratio quam emisi de Hierusalem in Babylonem

₂₁haec dicit Dominus exercituum Deus Israhel

ad Ahab filium Culia

et ad Sedeciam filium Maasiae

qui prophetant vobis in nomine meo mendaciter

ecce ego tradam eos in manu Nabuchodonosor regis Babylonis

et percutiet eos in oculis vestris

₂₂et adsumetur ex eis maledictio omni transmigrationi Iuda

quae est in Babylone dicentium

ponat te Dominus sicut Sedeciam et sicut Ahab

quos frixit rex Babylonis in igne

₂₃pro eo quod fecerint stultitiam in Israhel

et moechati sunt in uxores amicorum suorum

et locuti sunt verbum in nomine meo mendaciter

quod non mandavi eis

ego sum iudex et testis dicit Dominus

₂₄et ad Semeiam Neelamiten dices

₂₅haec dicit Dominus exercituum Deus Israhel

pro eo quod misisti in nomine tuo libros

ad omnem populum qui est in Hierusalem

et ad Sophoniam filium Maasiae sacerdotem

et ad universos sacerdotes dicens

₂₆Dominus dedit te sacerdotem pro Ioiadae sacerdote

ut sis dux in domo Domini

super omnem virum arrepticium et prophetantem

ut mittas eum in nervum et in carcerem

₂₇et nunc quare non increpasti Hieremiam Anathothiten

qui prophetat vobis

₂₈quia super hoc misit ad nos in Babylonem dicens

longum est aedificate domos et habitate

et plantate hortos et comedite fructum eorum

₂₉legit ergo Sophonias sacerdos librum istum

in auribus Hieremiae prophetae

₃₀et factum est verbum Domini ad Hieremiam dicens

₃₁mitte ad omnem transmigrationem dicens

haec dicit Dominus ad Semeiam Neelamiten

pro eo quod prophetavit vobis Semeias et ego non misi eum

et fecit vos confidere in mendacio

₃₂idcirco haec dicit Dominus

ecce ego visitabo super Semeiam Neelamiten et super semen eius

non erit ei vir sedens in medio populi huius

et non videbit bonum quod ego faciam populo meo ait Dominus

quia praevaricationem locutus est adversum Dominum