HIEREMIAS PROPHETA 28

₁et factum est in anno illo in principio regni Sedeciae regis Iuda

in anno quarto in mense quinto

dixit ad me Ananias filius Azur propheta de Gabaon in domo Domini

coram sacerdotibus et omni populo dicens

₂haec dicit Dominus exercituum Deus Israhel

contrivi iugum regis Babylonis

₃adhuc duo anni dierum

et ego referri faciam ad locum istum omnia vasa Domini

quae tulit Nabuchodonosor rex Babylonis de loco isto

et transtulit ea in Babylonem

₄et Iechoniam filium Ioachim regem Iuda

et omnem transmigrationem Iudae

qui ingressi sunt in Babylonem

ego convertam ad locum istum ait Dominus

conteram enim iugum regis Babylonis

₅et dixit Hieremias propheta ad Ananiam prophetam

in oculis sacerdotum et in oculis omnis populi

qui stabant in domo Domini

₆et ait Hieremias propheta amen sic faciat Dominus

suscitet Dominus verba tua quae prophetasti

ut referantur vasa in domo Domini

et omnis transmigratio de Babylone ad locum istum

₇verumtamen audi verbum hoc quod ego loquor in auribus tuis

et in auribus universi populi

₈prophetae qui fuerunt ante me et te ab initio

et prophetaverunt super terras multas

et super regna magna

de proelio et de adflictione et de fame

₉propheta qui vaticinatus est pacem

cum venerit verbum eius

scietur propheta quem misit Dominus in veritate

₁₀et tulit Ananias propheta catenam de collo Hieremiae prophetae

et confregit eam

₁₁et ait Ananias in conspectu omnis populi dicens

haec dicit Dominus

sic confringam iugum Nabuchodonosor regis Babylonis

post duos annos dierum de collo omnium gentium

₁₂et abiit Hieremias prophetes in viam suam

et factum est verbum Domini ad Hieremiam

postquam confregit Ananias propheta catenam de collo Hieremiae

prophetae dicens

₁₃vade et dices Ananiae haec dicit Dominus

catenas ligneas contrivisti et facies pro eis catenas ferreas

₁₄quia haec dicit Dominus exercituum Deus Israhel

iugum ferreum posui super collum cunctarum gentium istarum

ut serviant Nabuchodonosor regi Babylonis

et servient ei insuper et bestias terrae dedi ei

₁₅et dixit Hieremias propheta ad Ananiam prophetam

audi Anania non misit te Dominus

et tu confidere fecisti populum istum in mendacio

₁₆idcirco haec dicit Dominus

ecce emittam te a facie terrae

hoc anno morieris adversum Dominum enim

locutus es

₁₇et mortuus est Ananias propheta in anno illo mense septimo