HIEREMIAS PROPHETA 22

₁haec dicit Dominus descende in domum regis Iuda

et loqueris ibi verbum hoc

₂et dices

audi verbum Domini rex Iuda qui sedes super solium David

tu et servi tui et populus tuus

qui ingredimini per portas istas

₃haec dicit Dominus facite iudicium et iustitiam

et liberate vi oppressum de manu calumniatoris

et advenam et pupillum et viduam nolite contristare

neque opprimatis inique

et sanguinem innocentem ne effundatis in loco isto

₄si enim facientes feceritis verbum istud

ingredientur per portas domus huius reges

sedentes de genere David super thronum eius

et ascendentes currus et equos ipsi et servi et populus eorum

₅quod si non audieritis verba haec

in memet ipso iuravi dicit Dominus

quia in solitudinem erit domus haec

₆quia haec dicit Dominus super domum regis Iuda

Galaad tu mihi caput Libani

si non posuero te solitudinem urbes inhabitabiles

₇et sanctificabo super te interficientem virum et arma eius

et succident electam cedrum tuam

et praecipitabunt in ignem

₈et pertransibunt gentes multae per civitatem hanc

et dicet unusquisque proximo suo

quare fecit Dominus sic civitati huic grandi

₉et respondebunt eo quod dereliquerint pactum Domini Dei sui

et adoraverint deos alienos et servierint eis

₁₀nolite flere mortuum neque lugeatis super eum

fletu plangite eum qui egreditur

quia non revertetur ultra nec videbit terram nativitatis suae

₁₁quia haec dicit Dominus ad Sellum filium Iosiae regem Iuda

qui regnavit pro Iosia patre suo

qui egressus est de loco isto non revertetur huc amplius

₁₂sed in loco ad quem transtuli eum ibi morietur

et terram istam non videbit amplius

₁₃vae qui aedificat domum suam in iniustitia

et cenacula sua non in iudicio

amicum suum opprimet frustra et mercedem eius non reddet ei

₁₄qui dicit aedificabo mihi domum latam et cenacula spatiosa

qui aperit sibi fenestras

et facit laquearia cedrina pingitque sinopide

₁₅numquid regnabis quoniam confers te cedro

pater tuus numquid non comedit et bibit

et fecit iudicium et iustitiam tunc cum bene erat ei

₁₆iudicavit causam pauperis et egeni in bonum suum

numquid non ideo quia cognovit me dicit Dominus

₁₇tui vero oculi et cor ad avaritiam

et ad sanguinem innocentem fundendum

et ad calumniam et ad cursum mali operis

₁₈propterea haec dicit Dominus ad Ioachim filium Iosiae

regem Iuda

non plangent eum vae frater et vae fratres

non concrepabunt ei vae domine et vae inclite

₁₉sepultura asini sepelietur putrefactus

et proiectus extra portas Hierusalem

₂₀ascende Libanum et clama et in Basan da vocem tuam

et clama ad transeuntes quia contriti sunt omnes amatores tui

₂₁locutus sum ad te

in abundantia tua dixisti non audiam

haec est via tua ab adulescentia tua quia non audisti vocem meam

₂₂omnes pastores tuos pascet ventus

et amatores tui in captivitatem ibunt

et tunc confunderis et erubesces ab omni malitia tua

₂₃quae sedes in Libano et nidificas in cedris quomodo congemuisti

cum venissent tibi dolores quasi dolores parturientis

₂₄vivo ego dicit Dominus

quia si fuerit Iechonias filius Ioachim regis Iuda

anulus in manu dextera mea

inde avellam eum

₂₅et dabo te in manu quaerentium animam tuam

et in manu quorum tu formidas faciem

et in manu Nabuchodonosor regis Babylonis

et in manu Chaldeorum

₂₆et mittam te et matrem tuam quae genuit te

in terram alienam in qua nati non estis ibique moriemini

₂₇et in terram ad quam ipsi levant animam suam ut revertantur illuc

non revertentur

₂₈numquid vas fictile atque contritum vir iste Iechonias

numquid vas absque omni voluptate

quare abiecti sunt ipse et semen eius

et proiecti in terram quam ignoraverunt

₂₉terra terra terra audi sermonem Domini

₃₀haec dicit Dominus scribe virum istum sterilem

virum qui in diebus suis non prosperabitur

nec enim erit de semine eius vir qui sedeat super solium David

et potestatem habeat ultra in Iuda