HIEREMIAS PROPHETA 23

₁vae pastoribus qui disperdunt et dilacerant gregem pascuae meae

dicit Dominus

₂ideo haec dicit Dominus Deus Israhel

ad pastores qui pascunt populum meum

vos dispersistis gregem meum

eiecistis eos et non visitastis eos

ecce ego visitabo super vos malitiam studiorum vestrorum ait Dominus

₃et ego congregabo reliquias gregis mei de omnibus terris

ad quas eiecero eos illuc

et convertam eos ad rura sua et crescent et multiplicabuntur

₄et suscitabo super eos pastores et pascent eos

non formidabunt ultra et non pavebunt

et nullus quaeretur ex numero dicit Dominus

₅ecce dies veniunt ait Dominus

et suscitabo David germen iustum

et regnabit rex et sapiens erit et faciet iudicium et iustitiam in terra

₆in diebus illius salvabitur Iuda

et Israhel habitabit confidenter

et hoc est nomen quod vocabunt eum Dominus iustus noster

₇propter hoc ecce dies veniunt dicit Dominus

et non dicent ultra vivit Dominus

qui eduxit filios Israhel de terra Aegypti

₈sed vivit Dominus

qui eduxit et adduxit semen domus Israhel de terra aquilonis

et de cunctis terris ad quas eieceram eos illuc

et habitabunt in terra sua

₉ad prophetas

contritum est cor meum in medio mei

contremuerunt omnia ossa mea factus sum quasi vir ebrius

et quasi homo madidus a vino

a facie Domini et a facie verborum sanctorum eius

₁₀quia adulteris repleta est terra

quia a facie maledictionis luxit terra

arefacta sunt arva deserti

factus est cursus eorum malus et fortitudo eorum dissimilis

₁₁propheta namque et sacerdos polluti sunt

et in domo mea inveni malum eorum ait Dominus

₁₂idcirco via eorum erit quasi lubricum in tenebris

inpellentur enim et corruent in ea

adferam enim super eos mala annum visitationis eorum ait Dominus

₁₃et in prophetis Samariae vidi fatuitatem

prophetabant in Baal et decipiebant populum meum Israhel

₁₄et in prophetis Hierusalem vidi similitudinem

adulterium et iter mendacii

et confortaverunt manus pessimorum

ut non converteretur unusquisque a malitia sua

facti sunt mihi omnes Sodoma

et habitatores eius quasi Gomorra

₁₅propterea haec dicit Dominus exercituum ad prophetas

ecce ego cibabo eos absinthio et potabo eos felle

a prophetis enim Hierusalem est egressa pollutio super

omnem terram

₁₆haec dicit Dominus exercituum

nolite audire verba prophetarum

qui prophetant vobis et decipiunt vos

visionem cordis sui loquuntur non de ore Domini

₁₇dicunt his qui blasphemant me locutus est Dominus

pax erit vobis

et omni qui ambulat in pravitate cordis sui dixerunt

non veniet super vos malum

₁₈quis enim adfuit in consilio Domini et vidit et audivit sermonem eius

quis consideravit verbum illius et audivit

₁₉ecce turbo dominicae indignationis egredietur

et tempestas erumpens super caput impiorum veniet

₂₀non revertetur furor Domini usque dum faciat

et usque dum conpleat cogitationem cordis sui

in novissimis diebus intellegetis consilium eius

₂₁non mittebam prophetas et ipsi currebant

non loquebar ad eos et ipsi prophetabant

₂₂si stetissent in consilio meo

et nota fecissent verba mea populo meo

avertissem utique eos a via sua mala

et a pessimis cogitationibus suis

₂₃putasne Deus e vicino ego sum dicit Dominus et non Deus de longe

₂₄si occultabitur vir in absconditis et ego non videbo eum

dicit Dominus

numquid non caelum et terram ego impleo ait Dominus

₂₅audivi quae dixerunt prophetae

prophetantes in nomine meo mendacium atque dicentes

somniavi somniavi

₂₆usquequo istud in corde est prophetarum vaticinantium mendacium

et prophetantium seductiones cordis sui

₂₇qui volunt facere ut obliviscatur populus meus nominis mei

propter somnia eorum quae narrant unusquisque ad proximum

suum

sicut obliti sunt patres eorum nominis mei propter Baal

₂₈propheta qui habet somnium narret somnium

et qui habet sermonem meum loquatur sermonem meum vere

quid paleis ad triticum dicit Dominus

₂₉numquid non verba mea sunt quasi ignis ait Dominus

et quasi malleus conterens petram

₃₀propterea ecce ego ad prophetas ait Dominus

qui furantur verba mea unusquisque a proximo suo

₃₁ecce ego ad prophetas ait Dominus

qui adsumunt linguas suas et aiunt dicit Dominus

₃₂ecce ego ad prophetas somniantes mendacium ait Dominus

qui narraverunt ea

et seduxerunt populum meum in mendacio suo et in miraculis suis

cum ego non misissem eos nec mandassem eis

qui nihil profuerunt populo huic dicit Dominus

₃₃si igitur interrogaverit te populus iste

vel propheta aut sacerdos dicens quod est onus Domini

dices ad eos ut quid vobis onus

proiciam quippe vos dicit Dominus

₃₄et prophetes et sacerdos et populus qui dicit onus Domini

visitabo super virum illum et super domum eius

₃₅haec dicetis unusquisque ad proximum et ad fratrem suum

quid respondit Dominus et quid locutus est Dominus

₃₆et onus Domini ultra non memorabitur

quia onus erit unicuique sermo suus

et pervertitis verba Dei viventis

Domini exercituum Dei nostri

₃₇haec dices ad prophetam

quid respondit tibi Dominus et quid locutus est Dominus

₃₈si autem onus Domini dixeritis propter hoc haec dicit Dominus

quia dixistis sermonem istum onus Domini

et misi ad vos dicens nolite dicere onus Domini

₃₉propterea ecce ego tollam vos portans

et derelinquam vos et civitatem quam dedi vobis et patribus vestris a

facie mea

₄₀et dabo vos in obprobrium sempiternum

et in ignominiam aeternam quae numquam oblivione delebitur