HIEREMIAS PROPHETA 19

₁haec dicit Dominus vade et accipe lagunculam figuli testeam

a senioribus populi et a senioribus sacerdotum

₂et egredere ad vallem filii Ennom

quae est iuxta introitum portae Fictilis

et praedicabis ibi verba quae ego loquar ad te

₃et dices

audite verbum Domini reges Iuda et habitatores Hierusalem

haec dicit Dominus exercituum Deus Israhel

ecce ego inducam adflictionem super locum istum

ita ut omnis qui audierit illam tinniant aures eius

₄eo quod dereliquerint me et alienum fecerint locum istum

et libaverint in eo diis alienis

quos nescierunt ipsi et patres eorum et reges Iuda

et repleverunt locum istum sanguine innocentium

₅et aedificaverunt excelsa Baali

ad conburendos filios suos igni

in holocaustum Baali

quae non praecepi nec locutus sum nec ascenderunt in cor meum

₆propterea ecce dies veniunt dicit Dominus

et non vocabitur locus iste amplius Thofeth et vallis

filii Ennom

sed vallis Occisionis

₇et dissipabo consilium Iudae et Hierusalem in loco isto

et subvertam eos gladio in conspectu inimicorum suorum

et in manu quaerentium animas eorum

et dabo cadavera eorum escam volatilibus caeli et bestiis

terrae

₈et ponam civitatem hanc in stuporem et in sibilum

omnis qui praeterierit per eam obstupescet

et sibilabit super universa plaga eius

₉et cibabo eos carnibus filiorum suorum et carnibus filiarum suarum

et unusquisque carnes amici sui comedet in obsidione et in

angustia

in qua concludent eos inimici eorum et qui quaerunt animas eorum

₁₀et conteres lagunculam in oculis virorum qui ibunt tecum

₁₁et dices ad eos haec dicit Dominus exercituum

sic conteram populum istum et civitatem istam

sicut conteritur vas figuli quod non potest ultra instaurari

et in Thofeth sepelientur

eo quod non sit alius locus ad sepeliendum

₁₂sic faciam loco huic ait Dominus et habitatoribus eius

ut ponam civitatem istam sicut Thofeth

₁₃et erunt domus Hierusalem et domus regum Iuda sicut locus Thofeth

inmundae omnes domus

in quarum domatibus sacrificaverunt omni militiae caeli

et libaverunt libamina diis alienis

₁₄venit autem Hieremias de Thofeth

quo miserat eum Dominus ad prophetandum

et stetit in atrio domus Domini et dixit ad omnem populum

₁₅haec dicit Dominus exercituum Deus Israhel

ecce ego inducam super civitatem hanc et super omnes urbes eius

universa mala quae locutus sum adversum eam

quoniam induraverunt cervicem suam

ut non audirent sermones meos