HIEREMIAS PROPHETA 17

₁peccatum Iuda scriptum est stilo ferreo in ungue adamantino

exaratum super latitudinem cordis eorum

et in cornibus ararum eorum

₂cum recordati fuerint filii eorum ararum suarum

et lucorum lignorumque frondentium in montibus excelsis

₃sacrificantes in agro

fortitudinem tuam et omnes thesauros tuos in direptionem dabo

excelsa tua propter peccata in universis finibus tuis

₄et relinqueris sola ab hereditate tua quam dedi tibi

et servire te faciam inimicis tuis in terra quam ignoras

quoniam ignem succendisti in furore meo usque in aeternum

ardebit

₅haec dicit Dominus maledictus homo qui confidit in homine

et ponit carnem brachium suum

et a Domino recedit cor eius

₆erit enim quasi myrice in deserto

et non videbit cum venerit bonum

sed habitabit in siccitate in deserto

in terra salsuginis et inhabitabili

₇benedictus vir qui confidit in Domino

et erit Dominus fiducia eius

₈et erit quasi lignum quod transplantatur super aquas

quod ad humorem mittit radices suas

et non timebit cum venerit aestus

et erit folium eius viride

et in tempore siccitatis non erit sollicitum

nec aliquando desinet facere fructum

₉pravum est cor omnium et inscrutabile

quis cognoscet illud

₁₀ego Dominus scrutans cor et probans renes

qui do unicuique iuxta viam

et iuxta fructum adinventionum suarum

₁₁perdix fovit quae non peperit

fecit divitias et non in iudicio

in dimidio dierum suorum derelinquet eas

et in novissimo suo erit insipiens

₁₂solium gloriae altitudinis a principio locus sanctificationis nostrae

₁₃expectatio Israhel Domine

omnes qui te derelinquunt confundentur

recedentes in terra scribentur

quoniam dereliquerunt venam aquarum viventium Dominum

₁₄sana me Domine et sanabor salvum me fac et salvus ero

quoniam laus mea tu es

₁₅ecce ipsi dicunt ad me ubi est verbum Domini veniat

₁₆et ego non sum turbatus te pastorem sequens

et diem hominis non desideravi tu scis

quod egressum est de labiis meis rectum in conspectu tuo fuit

₁₇non sis mihi tu formidini spes mea tu in die

adflictionis

₁₈confundantur qui persequuntur me et non confundar ego

paveant illi et non paveam ego

induc super eos diem adflictionis et duplici contritione contere eos

₁₉haec dicit Dominus ad me vade et sta in porta filiorum populi

per quam ingrediuntur reges Iuda et egrediuntur

et in cunctis portis Hierusalem

₂₀et dices ad eos

audite verbum Domini reges Iuda et omnis Iudaea

cunctique habitatores Hierusalem qui ingredimini per portas istas

₂₁haec dicit Dominus custodite animas vestras

et nolite portare pondera in die sabbati

nec inferatis per portas Hierusalem

₂₂et nolite eicere onera de domibus vestris in die sabbati

et omne opus non facietis

sanctificate diem sabbati sicut praecepi patribus vestris

₂₃et non audierunt nec inclinaverunt aurem suam

sed induraverunt cervicem suam

ne audirent me et ne acciperent disciplinam

₂₄et erit si audieritis me dicit Dominus

ut non inferatis onera per portas civitatis huius in die sabbati

et si sanctificaveritis diem sabbati ne faciatis in ea

omne opus

₂₅ingredientur per portas civitatis huius reges

et principes sedentes super solium David

et ascendentes in curribus et equis

ipsi et principes eorum vir Iuda et habitatores

Hierusalem

et habitabitur civitas haec in sempiternum

₂₆et venient de civitate Iuda et de circuitu Hierusalem

et de terra Beniamin et de campestribus

et de montuosis et ab austro

portantes holocaustum et victimam et sacrificium et tus

et inferent oblationem in domum Domini

₂₇si autem non audieritis me ut sanctificetis diem sabbati

et ne portetis onus et ne inferatis per portas Hierusalem in die sabbati

succendam ignem in portis eius

et devorabit domos Hierusalem et non extinguetur