LIBER IUDITH 4

₁tunc audientes haec filii Israhel

qui habitabant in terra Iudaeae

timuerunt valde a facie eius

₂tremor etiam et horror invasit sensus eorum

ne hoc faceret Hierusalem et templo Domini

quod fecerat ceteris civitatibus et templis earum

₃et miserunt in omnem Samariam per circuitum usque Hiericho

et praeoccupaverunt omnes vertices montium

₄et muris circumdederunt vicos suos

et congregaverunt frumenta in praeparatione pugnae

₅sacerdos etiam Heliachim scripsit ad universos

qui erant contra Hesdraelon

quae est contra faciem campi magni iuxta Dothain

et universis per quos transitus esse

poterat

₆ut obtinerent ascensus montium

per quos via esse poterat ad Hierusalem

ut illic custodirent

ubi angustum iter esse poterat inter montes

₇et fecerunt filii Israhel

secundum quod constituerat eis sacerdos Domini Heliachim

₈et clamavit omnis populus ad Dominum instantia magna

et humiliaverunt animas suas in ieiuniis

ipsi et mulieres eorum

₉et induerunt se sacerdotes ciliciis

et infantes prostraverunt contra faciem templi Domini

et altare Domini operuerunt cilicio

₁₀et clamaverunt ad Deum Israhel unianimiter

ne darentur in praedam infantes eorum

et uxores eorum in divisionem

et civitates eorum in exterminium

et sancta eorum in pollutionibus

₁₁tunc Heliachim sacerdos Domini magnus circuivit omnem Israhel

adlocutusque est eos

₁₂dicens

scitote quoniam exaudivit Dominus preces vestras

si manentes permanseritis in ieiuniis et orationibus in conspectu Domini

₁₃memores estote Mosi servi Domini

qui Amalech confidentem in virtute sua et in potentia sua et in

exercitu suo

et in clypeis suis et in curribus suis et in equitibus suis

non ferro pugnando sed precibus sanctis orando deiecit

₁₄sic erunt universi hostes Israhel

si perseveraveritis in hoc opere quo coepistis

₁₅ad hanc igitur exhortationem eius deprecantes Dominum

permanebant in conspectu Domini

₁₆ita ut etiam hii qui holocausta Domino offerebant

praecincti ciliciis offerrent sacrificia Domino

et erat cinis super capita eorum

₁₇et ex toto corde suo omnes orabant Deum

ut visitaret populum suum Israhel