LIBER IUDITH 16

₁tunc cantavit canticum hoc Domino Iudith dicens

₂incipite Domino in tympanis cantate Deo in cymbalis

modulamini illi psalmum novum exaltate et invocate nomen eius

₃Dominus conterens bella Dominus nomen est illi

₄qui posuit castra sua in medio populi sui

ut eriperet nos de manu omnium inimicorum nostrorum

₅venit Assur ex montibus ab aquilone

in multitudine fortitudinis suae

cuius multitudo obturavit torrentes

et equi eorum cooperuerunt valles

₆dixit se incensurum fines meos

et iuvenes meos occisurum gladio

infantes meos dare in praedam et virgines in captivitatem

₇Dominus autem omnipotens nocuit eum

et tradidit eum in manus feminae

et confudit eum

₈non enim cecidit potens eorum a iuvenibus

nec filii Titan percusserunt eum

nec excelsi gigantes inposuerunt se illi

sed Iudith filia Merari in specie faciei suae dissolvit eum

₉exuit enim se vestimenta viduitatis

et induit se vestimenta laetitiae

in exultatione filiorum Israhel

₁₀unxit faciem suam unguento

conligavit cincinnos suos mitra

ad decipiendum illum

₁₁sandalia eius rapuerunt oculos eius

pulchritudo eius captivam fecit animam eius

amputavit pugione cervicem eius

₁₂horruerunt Persae constantiam eius et Medi audaciam eius

₁₃tunc ululaverunt castra Assyriorum

quando apparuerunt humiles mei arescentes in siti

₁₄filii puellarum conpunxerunt eos

et sicut pueros fugientes occiderunt eos

perierunt in proelio a facie Domini mei

₁₅hymnum cantemus Domino

hymnum novum cantemus Deo nostro

₁₆Adonai Domine magnus es tu et praeclarus in virtute

et quem superare nemo potest

₁₇tibi serviat omnis creatura tua quia dixisti et facta sunt

misisti spiritum tuum et creata sunt et non est qui resistat voci tuae

₁₈montes a fundamentis movebuntur cum aquis

petrae sicut cera liquescent ante faciem tuam

₁₉qui autem timent te magni erunt apud te prae omnia

₂₀vae genti insurgenti super genus meum

Dominus enim omnipotens vindicabit in eis

in die iudicii visitabit illos

₂₁dabit enim ignem et vermes in carnes eorum

ut urantur et sentiant usque in sempiternum

₂₂et factum est post haec

omnis populus post victoriam venit ad Hierusalem

adorare Dominum

et mox ut purificati sunt

obtulerunt omnes holocausta et vota et repromissiones suas

₂₃porro Iudith universa vasa bellica Holofernis

quae dedit illi populus

et conopeum quod ipsa sustulerat in

anathema oblivionis

₂₄erat autem populus iucundus secundum faciem sanctorum

et per tres menses gaudium huius victoriae celebratum est cum Iudith

₂₅post dies autem illos unusquisque rediit in sua

et Iudith magna facta est in Bethulia

et praeclarior erat universae terrae Israhel

₂₆erat etiam virtuti castitatis adiuncta

ita ut non cognosceret virum omnibus diebus vitae suae

ex quo defunctus est Manasses vir eius

₂₇erat autem diebus festis procedens cum gloria magna

₂₈mansit autem in domo viri sui annos centum quinque

et dimisit abram suam liberam

et defuncta est ac sepulta cum viro suo in Bethuliam

₂₉luxitque illam omnis populus diebus septem

₃₀in omni autem spatio vitae eius non fuit qui perturbaret Israhel

et post mortem eius annis multis

₃₁dies autem victoriae huius festivitatem ab Hebraeis

in numero dierum sanctorum accepit

et colitur a Iudaeis ex illo tempore usque in praesentem diem