ISAIAS PROPHETA 59

₁ecce non est adbreviata manus Domini ut salvare nequeat

neque adgravata est auris eius ut non exaudiat

₂sed iniquitates vestrae diviserunt inter vos et Deum vestrum

et peccata vestra absconderunt faciem eius a vobis ne exaudiret

₃manus enim vestrae pollutae sunt sanguine et digiti vestri iniquitate

labia vestra locuta sunt mendacium et lingua vestra iniquitatem fatur

₄non est qui invocet iustitiam neque est qui iudicet vere

sed confidunt in nihili et loquuntur vanitates

conceperunt laborem et pepererunt iniquitatem

₅ova aspidum ruperunt et telas araneae texuerunt

qui comederit de ovis eorum morietur

et quod confotum est erumpet in regulum

₆telae eorum non erunt in vestimentum

neque operientur operibus suis

opera eorum opera inutilia et opus iniquitatis in manibus eorum

₇pedes eorum ad malum currunt

et festinant ut effundant sanguinem innocentem

cogitationes eorum cogitationes inutiles

vastitas et contritio in viis eorum

₈viam pacis nescierunt et non est iudicium in gressibus eorum

semitae eorum incurvatae sunt eis

omnis qui calcat in ea ignorat pacem

₉propter hoc elongatum est iudicium a nobis

et non adprehendet nos iustitia

expectavimus lucem et ecce tenebrae

splendorem et in tenebris ambulavimus

₁₀palpavimus sicut caeci parietem

et quasi absque oculis adtrectavimus

inpegimus meridie quasi in tenebris

in caligosis quasi mortui

₁₁rugiemus quasi ursi omnes et quasi columbae meditantes gememus

expectavimus iudicium et non est salutem et elongata est a nobis

₁₂multiplicatae sunt enim iniquitates nostrae coram te

et peccata nostra responderunt nobis

quia scelera nostra nobiscum et iniquitates nostras cognovimus

₁₃peccare et mentiri contra Dominum

et aversi sumus ne iremus post tergum Dei nostri

ut loqueremur calumniam et transgressionem

concepimus et locuti sumus de corde verba mendacii

₁₄et conversum est retrorsum iudicium et iustitia longe stetit

quia corruit in platea veritas et aequitas non potuit ingredi

₁₅et facta est veritas in oblivione

et qui recessit a malo praedae patuit

et vidit Dominus et malum apparuit in oculis eius

quia non est iudicium

₁₆et vidit quia non est vir et aporiatus est quia non est qui occurrat

et salvavit sibi brachium suum

et iustitia eius ipsa confirmavit eum

₁₇indutus est iustitia ut lorica et galea salutis in capite eius

indutus est vestimentis ultionis et opertus est quasi pallio zeli

₁₈sicut ad vindictam quasi ad retributionem indignationis hostibus suis

et vicissitudinem inimicis suis

insulis vicem reddet

₁₉et timebunt qui ab occidente nomen Domini

et qui ab ortu solis gloriam eius

cum venerit quasi fluvius violentus quem spiritus Domini cogit

₂₀et venerit Sion redemptor

et eis qui redeunt ab iniquitate in Iacob dicit Dominus

₂₁hoc foedus meum cum eis dicit Dominus

spiritus meus qui est in te et verba mea quae posui in ore tuo

non recedent de ore tuo et de ore seminis tui

et de ore seminis seminis tui dixit

Dominus

amodo et usque in sempiternum