ISAIAS PROPHETA 58

₁clama ne cesses quasi tuba exalta vocem tuam

et adnuntia populo meo scelera eorum

et domui Iacob peccata eorum

₂me etenim de die in diem quaerunt et scire vias meas volunt

quasi gens quae iustitiam fecerit

et quae iudicium Dei sui non reliquerit

rogant me iudicia iustitiae adpropinquare Deo volunt

₃quare ieiunavimus et non aspexisti

humiliavimus animam nostram et nescisti

ecce in die ieiunii vestri invenitur voluntas

et omnes debitores vestros repetitis

₄ecce ad lites et contentiones ieiunatis

et percutitis pugno impie

nolite ieiunare sicut usque ad hanc diem

ut audiatur in excelso clamor vester

₅numquid tale est ieiunium quod elegi

per diem adfligere hominem animam suam

numquid contorquere quasi circulum caput suum

et saccum et cinerem sternere

numquid istud vocabis ieiunium et diem acceptabilem Domino

₆nonne hoc est magis ieiunium quod elegi

dissolve conligationes impietatis solve fasciculos deprimentes

dimitte eos qui confracti sunt liberos et omne onus disrumpe

₇frange esurienti panem tuum

et egenos vagosque induc in domum tuam

cum videris nudum operi eum et carnem tuam ne despexeris

₈tunc erumpet quasi mane lumen tuum et sanitas tua citius orietur

et anteibit faciem tuam iustitia tua

et gloria Domini colliget te

₉tunc invocabis et Dominus exaudiet clamabis et dicet ecce adsum

si abstuleris de medio tui catenam

et desieris digitum extendere et loqui quod non prodest

₁₀cum effuderis esurienti animam tuam

et animam adflictam repleveris

orietur in tenebris lux tua et tenebrae tuae erunt sicut meridies

₁₁et requiem tibi dabit Dominus semper

et implebit splendoribus animam tuam et ossa tua liberabit

et eris quasi hortus inriguus

et sicut fons aquarum cuius non deficient aquae

₁₂et aedificabuntur in te deserta saeculorum

fundamenta generationis et generationis suscitabis

et vocaberis aedificator sepium avertens semitas in quietem

₁₃si averteris a sabbato pedem tuum

facere voluntatem tuam in die sancto meo

et vocaveris sabbatum delicatum et sanctum Domini gloriosum

et glorificaveris eum dum non facis vias tuas

et non invenitur voluntas tua ut loquaris sermonem

₁₄tunc delectaberis super Domino

et sustollam te super altitudines terrae

et cibabo te hereditate Iacob patris tui

os enim Domini locutum est