ISAIAS PROPHETA 60

₁surge inluminare quia venit lumen tuum

et gloria Domini super te orta est

₂quia ecce tenebrae operient terram et caligo populos

super te autem orietur Dominus et gloria eius in te videbitur

₃et ambulabunt gentes in lumine tuo et reges in splendore ortus tui

₄leva in circuitu oculos tuos et vide

omnes isti congregati sunt venerunt tibi

filii tui de longe venient

et filiae tuae in latere sugent

₅tunc videbis et afflues et mirabitur et dilatabitur cor tuum

quando conversa fuerit ad te multitudo maris

fortitudo gentium venerit tibi

₆inundatio camelorum operiet te dromedariae Madian et Efa

omnes de Saba venient aurum et tus deferentes

et laudem Domino adnuntiantes

₇omne pecus Cedar congregabitur tibi

arietes Nabaioth ministrabunt tibi

offerentur super placabili altari meo

et domum maiestatis meae glorificabo

₈qui sunt isti qui ut nubes volant

et quasi columbae ad fenestras suas

₉me enim insulae expectant et naves maris in principio

ut adducam filios tuos de longe

argentum eorum et aurum eorum cum eis

nomini Domini Dei tui et Sancto Israhel quia glorificavit te

₁₀et aedificabunt filii peregrinorum muros tuos

et reges eorum ministrabunt tibi

in indignatione enim mea percussi te

et in reconciliatione mea misertus sum tui

₁₁et aperientur portae tuae iugiter die et nocte non claudentur

ut adferatur ad te fortitudo gentium

et reges earum adducantur

₁₂gens enim et regnum quod non servierit tibi peribit

et gentes solitudine vastabuntur

₁₃gloria Libani ad te veniet abies et buxus et pinus simul

ad ornandum locum sanctificationis meae

et locum pedum meorum glorificabo

₁₄et venient ad te curvi filii eorum qui humiliaverunt te

et adorabunt vestigia pedum tuorum omnes qui detrahebant tibi

et vocabunt te civitatem Domini Sion Sancti Israhel

₁₅pro eo quod fuisti derelicta et odio habita

et non erat qui per te transiret

ponam te in superbiam saeculorum

gaudium in generationem et generationem

₁₆et suges lac gentium et mamilla regum lactaberis

et scies quia ego Dominus salvans te et redemptor tuus Fortis Iacob

₁₇pro aere adferam aurum et pro ferro adferam argentum

et pro lignis aes et pro lapidibus ferrum

et ponam visitationem tuam pacem et praepositos tuos iustitiam

₁₈non audietur ultra iniquitas in terra tua

vastitas et contritio in terminis tuis

et occupabit salus muros tuos et portas tuas laudatio

₁₉non erit tibi amplius sol ad lucendum per diem

nec splendor lunae inluminabit te

sed erit tibi Dominus in lucem sempiternam

et Deus tuus in gloriam tuam

₂₀non occidet ultra sol tuus et luna tua non minuetur

quia Dominus erit in lucem sempiternam

et conplebuntur dies luctus tui

₂₁populus autem tuus omnes iusti in perpetuum hereditabunt terram

germen plantationis meae opus manus meae ad glorificandum

₂₂minimus erit in mille et parvulus in gentem fortissimam

ego Dominus in tempore eius subito faciam istud