ISAIAS PROPHETA 43

₁et nunc haec dicit Dominus creans te Iacob et formans te Israhel

noli timere quia redemi te

et vocavi nomine tuo meus es tu

₂cum transieris per aquas tecum ero et flumina non operient te

cum ambulaveris in igne non conbureris

et flamma non ardebit in te

₃quia ego Dominus Deus tuus Sanctus Israhel salvator tuus

dedi propitiationem tuam Aegyptum

Aethiopiam et Saba pro te

₄ex quo honorabilis factus es in oculis meis et gloriosus ego dilexi te

et dabo homines pro te et populos pro anima tua

₅noli timere quoniam tecum ego sum

ab oriente adducam semen tuum et ab occidente congregabo te

₆dicam aquiloni da et austro noli prohibere

adfer filios meos de longinquo et filias meas ab extremis terrae

₇et omnem qui invocat nomen meum

in gloriam meam creavi eum

et formavi eum et feci eum

₈educ foras populum caecum et oculos habentem

surdum et aures ei sunt

₉omnes gentes congregatae sunt simul et collectae sunt tribus

quis in vobis adnuntiet istud

et quae prima sunt audire nos faciat

dent testes eorum et iustificentur et audiant et dicant vere

₁₀vos testes mei dicit Dominus et servus meus quem elegi

ut sciatis et credatis mihi et intellegatis quia ego ipse sum

ante me non est formatus deus et post me non erit

₁₁ego sum ego sum Dominus et non est absque me salvator

₁₂ego adnuntiavi et salvavi auditum feci et non fuit in vobis alienus

vos testes mei dicit Dominus et ego Deus

₁₃et ab initio ego ipse et non est qui de manu mea eruat

operabor et quis avertet illud

₁₄haec dicit Dominus redemptor vester Sanctus Israhel

propter vos emisi Babylonem et detraxi vectes universos

et Chaldeos in navibus suis gloriantes

₁₅ego Dominus Sanctus vester creans Israhel Rex vester

₁₆haec dicit Dominus

qui dedit in mari viam et in aquis torrentibus semitam

₁₇qui eduxit quadrigam et equum agmen et robustum

simul obdormierunt nec resurgent

contriti sunt quasi linum et extincti sunt

₁₈ne memineritis priorum et antiqua ne intueamini

₁₉ecce ego facio nova et nunc orientur utique cognoscetis ea

ponam in deserto viam et in invio flumina

₂₀glorificabit me bestia agri dracones et strutiones

quia dedi in deserto aquas flumina in invio

ut darem potum populo meo electo meo

₂₁populum istum formavi mihi laudem meam narrabit

₂₂non me invocasti Iacob nec laborasti in me Israhel

₂₃non obtulisti mihi arietem holocausti tui

et victimis tuis non glorificasti me

non te servire feci in oblatione

nec laborem tibi praebui in ture

₂₄non emisti mihi argento calamum

et adipe victimarum tuarum non inebriasti me

verumtamen servire me fecisti in peccatis tuis

praebuisti mihi laborem in iniquitatibus tuis

₂₅ego sum ego sum ipse qui deleo iniquitates tuas propter me

et peccatorum tuorum non recordabor

₂₆reduc me in memoriam et iudicemur simul

narra si quid habes ut iustificeris

₂₇pater tuus primus peccavit

et interpretes tui praevaricati sunt in me

₂₈et contaminavi principes sanctos

dedi ad internicionem Iacob et Israhel in blasphemiam