ISAIAS PROPHETA 42

₁ecce servus meus suscipiam eum

electus meus conplacuit sibi in illo anima mea

dedi spiritum meum super eum

iudicium gentibus proferet

₂non clamabit neque accipiet personam

nec audietur foris vox eius

₃calamum quassatum non conteret et linum fumigans non extinguet

in veritate educet iudicium

₄non erit tristis neque turbulentus

donec ponat in terra iudicium et legem eius insulae expectabunt

₅haec dicit Dominus Deus creans caelos et extendens eos

firmans terram et quae germinant ex ea

dans flatum populo qui est super eam et spiritum calcantibus eam

₆ego Dominus vocavi te in iustitia et adprehendi manum tuam

et servavi et dedi te in foedus populi in lucem gentium

₇ut aperires oculos caecorum et educeres de conclusione vinctum

de domo carceris sedentes in tenebris

₈ego Dominus hoc est nomen meum

gloriam meam alteri non dabo et laudem meam sculptilibus

₉quae prima fuerant ecce venerunt

nova quoque ego adnuntio

antequam oriantur audita vobis faciam

₁₀cantate Domino canticum novum laus eius ab extremis terrae

qui descenditis in mare et plenitudo eius

insulae et habitatores earum

₁₁sublevetur desertum et civitates eius in domibus habitabit Cedar

laudate habitatores Petrae de vertice montium clamabunt

₁₂ponent Domino gloriam et laudem eius in insulis nuntiabunt

₁₃Dominus sicut fortis egredietur

sicut vir proeliator suscitabit zelum

vociferabitur et clamabit super inimicos suos confortabitur

₁₄tacui semper silui patiens fui

sicut pariens loquar dissipabo et absorbebo simul

₁₅desertos faciam montes et colles

et omne gramen eorum exsiccabo

et ponam flumina in insulas et stagna arefaciam

₁₆et ducam caecos in via

quam nesciunt

in semitis quas ignoraverunt ambulare eos faciam

ponam tenebras coram eis in lucem et prava in recta

haec verba feci eis et non dereliqui eos

₁₇conversi sunt retrorsum

confundantur confusione qui confidunt in sculptili

qui dicunt conflatili vos dii nostri

₁₈surdi audite et caeci intuemini ad videndum

₁₉quis caecus nisi servus meus

et surdus nisi ad quem nuntios meos misi

quis caecus nisi qui venundatus est

quis caecus nisi servus Domini

₂₀qui vides multa nonne custodies

qui apertas habes aures nonne audies

₂₁et Dominus voluit ut sanctificaret eum

et magnificaret legem et extolleret

₂₂ipse autem populus direptus et vastatus

laqueus iuvenum omnes

et in domibus carcerum absconditi sunt

facti sunt in rapinam nec est qui eruat

in direptionem et non est qui dicat redde

₂₃quis est in vobis qui audiat hoc adtendat et auscultet futura

₂₄quis dedit in direptionem Iacob et Israhel vastantibus

nonne Dominus ipse cui peccavimus

et noluerunt in viis eius ambulare et non audierunt legem eius

₂₅et effudit super eum indignationem furoris sui et forte bellum

et conbusit eum in circuitu et non cognovit

et succendit eum et non intellexit