ISAIAS PROPHETA 40

₁consolamini consolamini populus meus dicit

Deus vester

₂loquimini ad cor Hierusalem et avocate eam

quoniam conpleta est malitia eius dimissa est iniquitas

illius

suscepit de manu Domini duplicia pro omnibus peccatis suis

₃vox clamantis in deserto parate viam Domini

rectas facite in solitudine semitas Dei nostri

₄omnis vallis exaltabitur et omnis mons et collis humiliabitur

et erunt prava in directa et aspera in vias planas

₅et revelabitur gloria Domini

et videbit omnis caro pariter quod os Domini locutum est

₆vox dicentis clama

et dixi quid clamabo

omnis caro faenum et omnis gloria eius quasi flos agri

₇exsiccatum est faenum et cecidit flos

quia spiritus Domini sufflavit in eo

vere faenum est populus

₈exsiccatum est faenum cecidit flos

verbum autem Dei nostri stabit

in aeternum

₉super montem excelsum ascende tu quae evangelizas Sion

exalta in fortitudine vocem tuam quae

evangelizas Hierusalem

exalta noli timere dic civitatibus Iudae ecce Deus vester

₁₀ecce Dominus Deus in fortitudine veniet

et brachium eius dominabitur

ecce merces eius cum eo et opus illius coram eo

₁₁sicut pastor gregem suum pascet

in brachio suo congregabit agnos et in sinu suo levabit

fetas ipse portabit

₁₂quis mensus est pugillo aquas et caelos palmo ponderavit

quis adpendit tribus digitis molem terrae

et libravit in pondere montes et colles in statera

₁₃quis adiuvit spiritum Domini

aut quis consiliarius eius fuit et ostendit illi

₁₄cum quo iniit consilium et instruxit eum

et docuit eum semitam iustitiae

et erudivit eum scientiam et viam prudentiae ostendit illi

₁₅ecce gentes quasi stilla situlae

et quasi momentum staterae reputatae sunt

ecce insulae quasi pulvis exiguus

₁₆et Libanus non sufficiet ad succendendum

et animalia eius non sufficient ad holocaustum

₁₇omnes gentes quasi non sint sic sunt coram eo

et quasi nihilum et inane reputatae sunt ei

₁₈cui ergo similem fecistis Deum aut quam imaginem ponetis ei

₁₉numquid sculptile conflavit faber

aut aurifex auro figuravit illud et lamminis argenteis argentarius

₂₀forte lignum et inputribile elegit artifex sapiens

quaerit quomodo statuat simulacrum quod non moveatur

₂₁numquid non scietis numquid non audietis

numquid non adnuntiatum est ab initio vobis

numquid non intellexistis fundamenta terrae

₂₂qui sedet super gyrum terrae

et habitatores eius sunt quasi lucustae

qui extendit velut nihilum caelos

et expandit eos sicut tabernaculum ad inhabitandum

₂₃qui dat secretorum scrutatores quasi non sint

iudices terrae velut inane fecit

₂₄et quidem neque plantatos neque satos

neque radicato in terra trunco eorum

repente flavit in eos et aruerunt

et turbo quasi stipulam auferet eos

₂₅et cui adsimilastis me et adaequastis dicit Sanctus

₂₆levate in excelsum oculos vestros et videte quis creavit haec

qui educit in numero militiam eorum et omnes ex nomine vocat

prae multitudine fortitudinis et roboris virtutisque eius

neque unum reliquum fuit

₂₇quare dicis Iacob et loqueris Israhel

abscondita est via mea a Domino

et a Deo meo iudicium meum transibit

₂₈numquid nescis aut non audisti

Deus sempiternus Dominus qui creavit terminos terrae

non deficiet neque laborabit nec est investigatio sapientiae eius

₂₉qui dat lasso virtutem

et his qui non sunt fortitudinem et robur multiplicat

₃₀deficient pueri et laborabunt

et iuvenes in infirmitate cadent

₃₁qui autem sperant in Domino mutabunt fortitudinem

adsument pinnas sicut aquilae

current et non laborabunt ambulabunt et non deficient