ISAIAS PROPHETA 37

₁et factum est cum audisset rex Ezechias scidit vestimenta sua

et obvolutus est sacco et intravit in domum Domini

₂et misit Eliachim qui erat super domum

et Sobnam scribam et seniores de sacerdotibus opertos saccis

ad Isaiam filium Amos prophetam

₃et dixerunt ad eum haec dicit Ezechias

dies tribulationis et correptionis et blasphemiae dies haec

quia venerunt filii usque ad partum

et virtus non est parienti

₄si quo modo audiat Dominus Deus tuus verba Rabsaces

quem misit rex Assyriorum dominus suus

ad blasphemandum Deum viventem

et obprobrandum sermonibus

quos audivit Dominus Deus tuus

leva ergo orationem pro reliquiis quae reppertae sunt

₅et venerunt servi regis Ezechiae ad Isaiam

₆et dixit ad eos Isaias

haec dicetis domino vestro haec dicit Dominus

ne timeas a facie verborum quae audisti

quibus blasphemaverunt pueri regis Assyriorum me

₇ecce ego dabo ei spiritum et audiet nuntium

et revertetur ad terram suam

et corruere eum faciam gladio in terra sua

₈reversus est autem Rabsaces

et invenit regem Assyriorum proeliantem adversus Lobna

audierat enim quia profectus esset de Lachis

₉et audivit de Tharaca rege Aethiopiae dicentes

egressus est ut pugnet contra te

quod cum audisset misit nuntios ad Ezechiam dicens

₁₀haec dicetis Ezechiae regi Iudae loquentes

non te decipiat Deus tuus in quo tu confidis dicens

non dabitur Hierusalem in manu regis Assyriorum

₁₁ecce tu audisti omnia quae fecerunt reges Assyriorum

omnibus terris quas subverterunt

et tu poteris liberari

₁₂numquid eruerunt eos dii gentium quos subverterunt patres mei

Gozan et Aran et Reseph et filios Eden qui erant in Thalassar

₁₃ubi est rex Emath et rex Arfad

et rex urbis Seffarvaim Anahe et Ava

₁₄et tulit Ezechias libros de manu nuntiorum et legit eos

et ascendit in domum Domini

et expandit eos Ezechias coram Domino

₁₅et oravit Ezechias ad Dominum dicens

₁₆Domine exercituum Deus Israhel qui sedes super cherubin

tu es Deus solus omnium regnorum terrae

tu fecisti caelum et terram

₁₇inclina Domine aurem tuam et audi

aperi Domine oculos tuos et vide

et audi omnia verba Sennacherib

quae misit ad blasphemandum Deum viventem

₁₈vere enim Domine desertas fecerunt reges Assyriorum terras

et regiones earum

₁₉et dederunt deos earum igni

non enim erant dii

sed opera manuum hominum lignum et lapis

et comminuerunt eos

₂₀et nunc Domine Deus noster salva nos de manu eius

et cognoscant omnia regna terrae

quia tu es Dominus solus

₂₁et misit Isaias filius Amos ad Ezechiam dicens

haec dicit Dominus Deus Israhel

pro quibus rogasti me de Sennacherib rege Assyriorum

₂₂hoc est verbum quod locutus est Dominus super eum

despexit te subsannavit te virgo filia Sion

post te caput movit filia Hierusalem

₂₃cui exprobrasti et quem blasphemasti

et super quem exaltasti vocem

et levasti altitudinem oculorum tuorum

ad Sanctum Israhel

₂₄in manu servorum tuorum exprobrasti Domino et dixisti

in multitudine quadrigarum mearum

ego ascendi altitudinem montium iuga Libani

et succidam excelsa cedrorum eius electas abietes

illius

et introibo altitudinem summitatis eius saltum Carmeli eius

₂₅ego fodi et bibi aquam

et exsiccavi vestigio pedis mei omnes rivos aggerum

₂₆numquid non audisti quae olim fecerim ei

ex diebus antiquis ego plasmavi illud et nunc adduxi

et factum est in eradicationem collium conpugnantium et civitatum

munitarum

₂₇habitatores earum breviata manu contremuerunt et confusi sunt

facti sunt sicut faenum agri et gramen pascuae

et herba tectorum quae exaruit antequam maturesceret

₂₈habitationem tuam et egressum tuum et introitum tuum cognovi

et insaniam tuam contra me

₂₉cum fureres adversum me superbia tua ascendit in aures meas

ponam ergo circulum in naribus tuis et frenum in labiis tuis

et reducam te in via per quam venisti

₃₀tibi autem hoc erit signum

comede hoc anno quae sponte nascuntur

et in anno secundo pomis vescere

in anno autem tertio seminate et metite

et plantate vineas et comedite fructum earum

₃₁et mittet id quod salvatum fuerit de domo Iuda et quod reliquum est radicem deorsum

et faciet fructum sursum

₃₂quia de Hierusalem exibunt reliquiae et salvatio de monte Sion

zelus Domini exercituum faciet istud

₃₃propterea haec dicit Dominus de rege Assyriorum

non introibit civitatem hanc

et non iaciet ibi sagittam et non occupabit eam clypeus

et non mittet in circuitu eius aggerem

₃₄in via qua venit per eam revertetur

et civitatem hanc non ingredietur dicit Dominus

₃₅et protegam civitatem istam ut salvem eam

propter me et propter David servum meum

₃₆egressus est autem angelus Domini

et percussit in castris Assyriorum centum octoginta quinque

milia

et surrexerunt mane et ecce omnes cadavera mortuorum

₃₇et egressus est et abiit et reversus est Sennacherib rex Assyriorum

et habitavit in Nineve

₃₈et factum est cum adoraret in templo Nesrach deum suum

Adramelech et Sarasar filii eius percusserunt eum gladio

fugeruntque in terram Ararat

et regnavit Asoraddon filius eius pro eo