ISAIAS PROPHETA 34

₁accedite gentes et audite et populi adtendite

audiat terra et plenitudo eius orbis et omne germen eius

₂quia indignatio Domini super omnes gentes

et furor super universam militiam eorum

interfecit eos et dedit eos in occisionem

₃interfecti eorum proicientur

et de cadaveribus eorum ascendet fetor

tabescent montes sanguine eorum

₄et tabescet omnis militia caelorum

et conplicabuntur sicut liber caeli

et omnis militia eorum defluet

sicut defluit folium de vinea et de ficu

₅quoniam inebriatus est in caelo gladius meus

ecce super Idumeam descendet

et super populum interfectionis meae ad iudicium

₆gladius Domini repletus est sanguine incrassatus est adipe

de sanguine agnorum et hircorum

de sanguine medullatorum arietum

victima enim Domini in Bosra et interfectio magna in terra Edom

₇et descendent unicornes cum eis et tauri cum potentibus

inebriabitur terra eorum sanguine et humus eorum adipe pinguium

₈quia dies ultionis Domini annus retributionum iudicii Sion

₉et convertentur torrentes eius in picem et humus eius in sulphur

et erit terra eius in picem ardentem

₁₀nocte et die non extinguetur

in sempiternum ascendet fumus eius a generatione in

generationem

desolabitur in saeculum saeculorum non erit transiens per

eam

₁₁et possidebunt illam onocrotalus et ericius

et ibis et corvus habitabunt in ea

et extendetur super eam mensura ut redigatur ad nihilum

et perpendiculum in desolationem

₁₂nobiles eius non erunt ibi regem potius invocabunt

et omnes principes eius erunt in nihilum

₁₃et orientur in domibus eius spinae et urticae

et paliurus in munitionibus eius

et erit cubile draconum et pascua strutionum

₁₄et occurrent daemonia onocentauris

et pilosus clamabit alter ad alterum

ibi cubavit lamia et invenit sibi requiem

₁₅ibi habuit foveam ericius et enutrivit catulos

et circumfodit et fovit in umbra eius

illuc congregati sunt milvi alter ad alterum

₁₆requirite diligenter in libro Domini et legite

unum ex eis non defuit

alter ad alterum non quaesivit

quia quod ex ore meo procedit ille mandavit

et spiritus eius ipse congregavit ea

₁₇et ipse misit eis sortem

et manus eius divisit eam illis in mensuram

usque in aeternum possidebunt eam

in generatione et generatione habitabunt in ea